Удмуртиысь делегат Татышлы ёросын удмурт кылэз дышетэмзы сярысь малпанзэ вераз

Отчы Оренбург, Челябинск, Курган, Самара, Саратов, Свердловск улосвылъёсысь, Татарстанысь, Удмуртиысь но делегациос вуизы. Форумын полилингвальной, билингвальной дышетонэз азинтонлы сӥзем площадкаос но ужазы. Съездын ивортӥзы, туэ 1-тӥ куарусёнэ Татышлы ёросысь Выль Татышлыын удмурт кылэз мургес дышетонъя полилингвальной школа усьтӥськоз шуыса. Та дыре тодон-валан юртын тупатон ужъёс мыно. Полилингвальной школа БР-лэн тӧроезлэн Радий Хабировлэн ӵектэмезъя лэсьтӥське.

Удмуртиысь вуэм делегациез таӵе ивор туж шумпоттӥз. УР-ысь дышетонъя министрлэн воштӥсез Тамара Ворожцова Татышлы ёросын удмурт кылэз дышетэмзы сярысь малпанзэ вераз:

- Выль Татышлыысь школа сярысь трос кылэммы вань. Отын дышетскисьёс Ижевскын ортчись удмурт кылъя регионъёс куспысь олимпиадае пырисько. Шумпотымон, школалэн статусэз воштӥськоз. Выльдэм школае ми одно ик вуылыны тыршом.

Т. Ворожцова Башкортостанлэн кивалтэтэзлы тау кылъёссэ вераз, регионын анай кылъёсты дышетонлы бадӟым саклык висъяське шуыса.

- Съезд туж тунсыко ортче. Трос ӵектонъёс луизы этнокультурной, билингвальной, полилингвальной дышетонэз радъян но азинтон пумысен. Ми дорын но, Удмуртиын, билингвальной школаос вань, нош полилингвальнойёс ӧвӧл на. Соин туннэ ужрад туж пайдаё но луиз. Азьланяз та сярысь одно ик малпаськоно, - вераз Т. Ворожцова.

Фото:Валерий Шахов