Пичи чеберай анай кылыныз данъяське

Праздникын Уйпал, Лымшор, Шор, Кар Чеберайёс но Батыръёс пусъемын вал. Со сяна, нылпиос пӧртэм номинациосын дунъямын. Янаулысь И. Ш. Муксинов нимо гимназиын дышетскись Елизавета Шартдинова «Покчи кылчи» номинациын вормисе потӥз. Конкурсын таӵе нимын Удмуртилэн палэнысьтыз вуэм тужгес усто нылпиосты данъязы. «Шумпотӥськомы, куке конкурсамы палэнысь пиналъёс но пырисько. Кылем арын отчы Башкортостанысь куать видеоужъёс вуизы. Соосты ми туж шунытэн пумитамы. Данъян ужрадын но палэнысь удмуртъёслы нимысьтыз саклык висъяське. Озьы ми Удмуртиысь нылпиослы возьматыны тыршиськом, соос но анай кылзэс утё но азинто, пӧртэм конкурсъёсы пырисько шуыса, - вера «Удмурт нылкышно кенеш» огазеяськонлэн ужаз пыриськись Алеся Главатских. – Кылем арын конкурс куинетӥ ползэ онлайн амалэн радъяськиз. Арысь аре отчы Башкортостанысь тросгес ужъёс вуо. Тӥ дорысь пиналъёс милемыз чебер калык костюмъёсынызы паймыто. Нылпиосты данъяку «Покчи кылчи» номинациын вормисез, Янаулысь Елизавета Шартдиноваез ми камзолэзъя тодмамы. Сыӵе дӥськутэз тӥ дорын гинэ дӥсяло. Азьланяз эшшо но тросгес нылпиос конкурсэ мед пыриськысалзы. Вормисьёс пӧлын мед луозы чылкыт удмурт кылын вераськись пиналъёс».