Удмуртиын литературая конкурслы йылпумъянъёс лэсьтӥзы

«Удмурт дунне» газетэн но Кун Думаысь депутатэн Лариса Бурановаен ялэм «Ингож» литературной конкурсэ пыриськемъёс но отын вормисьёс, писательёс, литературоведъёс, редакторъёс люкаськизы «Ингож усьтӥське» котырез ӝӧке люкаськизы.

«Ингож» конкурсэ пыриськизы 16 арескысен 35 аресозь егитъёс. Ужъёсты учкиз нимысьтыз жюри. Лариса Бурановалэн юрттэмезъя, коньдон премиосын пусъемын 9 адями. Вормисьёсты ӟечкылан, егит усточиослэсь гожъяськон мылкыдзэс ӝутон сяна, котырес ӝӧк сьӧрын вераськон мынӥз удмурт литературалэн но анай кыллэн ӵуказе нуналыз сярысь. Та пумысен сюлэмшугзэ усьтӥз Кун Думаысь депутат Лариса Буранова: «Котькыӵе литератураез басьты, со выль авторъёстэк, егит гожъяськисьёстэк, выль произведениостэк улыны уг быгаты. Та конкурсэз малпакумы, мынам тодэме потӥз, кыӵе туала удмурт литературалэн ымнырыз, кызьы со ассэ шӧдэ, кызьы туала удмурт литератураын улэ анай кылмы? Мон али ёросъёстӥ калыкен пумиськылыса ветлӥсько. Туж ӧжытэз быгатэ чебер, "ческыт" удмурт кылын вераськыны. Та конкурс малпаськытэ: макем пиналъёс ӟеч тодо, дышето удмурт кылэз школаосын».

Ольга Ахметзянова (туспуктэм вылын шорысез) ужрадысь Тау карон гожтэтэн бертӥз. Со вотэс бамаз гожтэ: «Творческий конкурс "Ингож" наградил своих талантливых участников премиями. Безмерно рада, что я среди таких милых, умеющих любить свой родной язык, людей. Мон удмурт! Тау, Удмурт дунне!»

Ужрадэз йылпумъяса, «Удмурт дунне» газетлэн валтӥсь редакторез Елена Миннигараева пусйиз:

- Туала егитъёс вотэсъёсын гожъясько, мылкыдзэс верало, нош рос-прос литература борды кутскыны ӵемысь уг дӥсьто. Но туж троссэ лэсьтыны луэ ини егит дыръя ик. Историез учконо ке, тодмо писатель Геннадий Красильников аслэсьтыз классика луэм «Вуж юрт» повестьсэ гожтӥз ай студент дыръяз. Нош поэтлэсь, драматурглэсь Игнатий Гавриловлэсь пьесазэ 19 аресказ ни пуктӥзы Удмурт театрын. Ашальчи Окилэн книгаез потӥз 25 арес дыръяз, отчы пырем кылбуръёс озьы ик классика луизы, соос туннэ нуналлы но сюлэмез вырӟыто. Таӵе примеръёс трос вераны луоно. Туж оскиськом, та конкурс бере тӥ удмурт литература шоры мукетгес синмын учкыны кутскоды. Возьмаськом выль ужъёстэс!

Туспуктэмез Максим Егоровлэн.

Источник: "Удмурт дунне" газет