«Улэм-вылэм Перепись»

Улэм-вылэм Перепись – тӧдьы йырсиё, бамаз ӵуж пужыё нылаш. Со туж яратэ вылэм мунёосын шудыны. Со сяна, нылаш трос лыдӟиськем. Солы пӧртэм калык выжыкылъёс кельшо вылэм. Арлыдыз пичи ке но, Перепись кылкутӥсь луэменыз висъяськем. Котькуд кутскем ужзэ со йылаз-пумаз вуттылэм.

Перепись анаеныз улэм. Анаез нылзэ туж яратэм. Нылызлэн быгатонлыкъёсыз шоры со котьку данъяськыса учкем. Нылызлы вань тодон-валанзэ сётыны, сое вылезлы дышетыны тыршем: нунал выль иворъёсты лыдӟылэм, Россиын улӥсь калыкъёслэн сям-йылолъёсынызы тодматэм.

Куарусён толэзе, шулдыр нуналэ, Перепись писпуосысь усьылэм чебересь куаръёсты бичаны потэм. Соку со почтальонэз пумитам. Нылаш туж шумпотэм: газет-журналъёс нуллӥсь агай солэсь яратоно журналзэ ваем! Почтальон азьвыл Переписен котьку пальпотыса ӟечбуръяське вал, нош туннэ йӧн-йӧн шораз учке. Мар ке веранэз вань, лэся.

Почтальонлэсь сётэм конвертсэ басьтыса, Перепись бызьыса пыриз дораз. Кӧттыр пӧзьтӥсь анаез нылызлэсь конвертэн пыремзэ адӟыса валатскиз: кематэк нылыз тунсыко адямиосын тодматскоз.

Перепись анаезлэсь тодӥз, шаерамы «Всероссийская перепись населения-2021» ужрад ортчоз шуыса. Нылаш лыдъян-чотанэз чидатэк витиз. Малы ке шуоно та бадӟым ужрадын со валтӥсь ужез быдэсъялоз.

Нылаш мукет иворлы но шумпотӥз – 2021-тӥ арын лыдъян-чотан цифровой амалэн радъяськоз. Ужрадэ смартфон, компьютер пыр но пыриськыны луоз. Дорысь потанэз уз луы!

Тани вуиз кема возьмам нунал. Перепись аспӧртэм кузь сюресэ потӥз, кытын со олокӧня адямиосын тодматскиз, азьвыл вуылымтэ бадӟымесь но пичиесь гуртъёсы вуылӥз, тодмотэм городъёсты адӟиз. Нылаш Россиын улӥсь пӧртэм калыкъёсын тодматскиз. Соос Переписез вордскем кылынызы ӟечбуръяськыса пумитазы. Нылашлэн тужгес тодаз кылиз Выль Татышлы гуртын улӥсь Виктория. Удмурт нылаш солы суредзэ кузьмаз – отын Перепись суредамын.