Суредъёсъя онлайн-конкурслы йылпумъянъёс лэсьтыса

Андрей Васильевич веросъёсаз, этюдъёсаз, новеллаосаз инкуазез, улонысь суредъёсты яркыт возьматыны быгатэ вал. Пиналъёс но ужъёсазы вордскем шаерзэс гажамзэс, соин данъяськем мылкыдзэс яркыт возьматыны тыршиллям. Конкурсэ пыриськисьёслэсь суредъёссэс дунъяны юрттӥз Бурай ёросысь Алтау гуртысь Анатолий Галиханов. Анатолий Шарифьянович Свердловск улосвылысь Краснотурьинск городысь художествоя училищеын дышетскем, 24 ар ӵоже школаын нылпиослы суредаськонъя урокъёсты нуэм.

Конкурсэ вуэм суредъёсты кык группаосъя дунъямы: нырысетӥ группа – 5-6-тӥ классъёсын дышетскисьёс, кыкетӥ группа – 7-8-тӥ классъёс. Вормисьёслэсь нимъёссэс газетмылэсь 4-тӥ шуркынмонэ потэм номерзэ лыдӟыса тододы.

Суредъёсты дунъяса, Анатолий Шарифьянович малпанъёссэ гожтэ: «Виктория Пукроковалэн суредэз туж «кужмо», «улэп». Компоновкаез но туж умой. Дарья Шайсламовалэн но суредэз чебер пӧрмем: пространство шӧдӥське, вуын вужеръёс умой адӟытэмын, нырысетӥ план умой ужамын. Кармелита Муратшиналэн, Есения Фарвазетдиновалэн суредъёссы туж усто пӧрмиллям. Анелия Рахматуллина суредзэ карандашен суредам. Суредаз омыр шӧдӥське. Но кӧсгес пӧрмемын, азьпалась объектъёсты юнгес адӟытоно вал. Ева Гильмаутдинова нырысетӥ но кыкетӥ планъёс бордын ӟеч ужам. Анастасия Шайсламовалэн ужез бордын шыпытлык ке шӧдӥське, Таня Асатовалэн суредаз яркытэсь буёлъёс «нюръясько». Полина Мингараева но суредзэ тыршыса быдэстэм. Аделия Нигаматуллина азьпалась но кыдёкысь планъёс бордын зол ужам, компоновкаез туж умой. Эмилия Шагиахметовалэн ужаз сӥзьыл мылкыд шӧдӥське, но живописез ӧжытгес. Озьы ик суредъёссы бордын тыршыса ужаллям Игорь Садиев, Илона Шайдуллина. Бурай, Калтасы ёросысь нылпиослэсь но суредъёссэс адӟеме туж потэ вал, малы ке но ужъёссы ӧвӧл».

Пусъёно, Кызыл-Яр школаысь вуэм суредъёс А. Гильмаевлэн веросъёсызъя, новеллаосызъя но этюдъёсызъя лэсьтэмын. Пиналъёс гожъясьлэн творчествоеныз но тодматскиллям.

Вормисьёсты но призёръёсты дипломъёс витё, нош  соослэсь кивалтӥсьёссэс – тау карон гожтэтъёс. Соос кузёоссы кие онлайн амалэн вуозы.  

Туспуктэм вылын: Есения Фарвазетдиновалэн суредэз.