-11 °С
Салкым
Вань иворъёс
Конкурсъёс
1 январь 2021, 02:00
Республикаысь вить усто мушкасьёс пӧлын
Кылем арняе Уфаын, Башкортостанысь аграрной кун университетын, мушкасьёслэн куинь республика конкурсъёссы радъяськизы: муш утисьёслэн 16-тӥ конкурссы, 10-тӥез «Юный пчеловод» конкурс но муш утись династиослэн 10-тӥ конкурссы. Туэ ужрадэ 48 ёросъёсысь 63 муш утисьёс но 29 ёросъёсысь 33 пиналъёс пыриськизы. Соос теорияя но практикая тодон-валанъёссэс возьматӥзы.
Татышлы ёросысь Арибаш гуртысь вылӥ тодон-валано мушкась Леонид Байдуллин но республика конкурсэ вуылӥз. Отысь со витетӥ интыен берытскиз, нырысетӥ инты утэм мушкасьлэсь ньыль баллы гинэ кылиз. Мушкасез БР-ысь Гурт хозяйствоя министерстволэн Данъян грамотаеныз но дуно кузьымен данъязы.
Леонид Хамидуллович конкурсэ огназ ӧз ветлы, отчы со Арибаш школаысь 9-тӥ классын дышетскись Тимур Шайхиевен вуылӥз. Угось биологияя дышетӥсь ёросысь нылпиослэн творчествоя юртсы бордысь «Пчеловодство» огазеяськонэн кивалтэ.
- 2010-тӥ арозь школаямы «Пчеловодство» предмет вань вал. Пиналъёс урокъёсы шумпотыса пыразы. 2011-тӥ арысен кружок радъяське. Муш утёнэн тунсыкъяськись пиналъёсын конкурсъёсы но вуылыны тыршиськом, - вера Л. Байдуллин.
Вераны кулэ, мушкасьёслэн республика конкурсазы Леонид Хамидуллович витетӥ ползэ пыриськиз ни. Пӧртэм аръёсы 2-тӥ, 3-тӥ интыосын но берытскылӥз.
- Туэ ужрад сярысь бергес ивортӥзы. Кык нунал куспын пыр-поч дасяськыны ӧз луы, - шуэ Л. Байдуллин.
Конкурсантъёсты ӟечкыланы республикаысь куноос но – мушкасьёслэн «Апимондия» калыккуспо ассоциацизылэн президентэз Филипп Маккейб, Россиысь мушкасьёслэн союззылэн президентэз Арнольд Бутов – вуизы. Соос паймемын вал, республикаын нылпиослы но муш утёнъя конкурсъёс радъясько шуыса.
Новости партнеров