Удмурт чеберай

Отчы гожъяськись нылкышноос пыриськизы. Соос вотэс бамазы семьязы, дорзы, йылолъёссы, удмуртлыксэс гажамзы сярысь гожъязы. Интернет-ӵошатсконын туж синмаськымон нылъёсты Инстамусокай, Инстадыдыкай но Инстачеберай номинициосын пусйизы.

Интернет-вожвылъяськонэ Камсьӧрын будэм удмурт ныл Наталия Романова но пыриськиз. Газетмес лыдӟисьёслы со Наташа Мухаяроваен тодмо. Татышлы ёросысь Улысь Балтач школаын дышетскыкуз со «Ошмес» газетэн ӟеч кусыпъёс возиз. Наталия конкурсын но вордскем палъёссэ мур гажамзэ возьматӥз. Вотэс бамаз со вордскем Калмияр гуртысьтыз Уллапал урамез сярысь пыр-поч гожтӥз.

⠀Дунъясьёс вакчи дыр куспын огкылысь Наташалы нырысетӥ инты сётӥзы! Ваньзы удмурт кылын вольыт гожъяськемезлы, мур пуштросо ивортонъёсызлы но туспуктэмъёсызлы синмаськизы!