Котькуд пиналлэн сюлмаз усьтон шедьтэ

Аниса Шакирова дышетон удысэ Можгаысь педучилищеез йылпумъяса вуиз. Бӧрысь заочно Уральской кун педуниверситетын дышетскиз. Та удысын Аниса Сахиповна 36 ар ини. «Дышетэм нылпиосылэсь нылпиоссэс дышетӥсько ни. Озьы ӵем тупалляз, одӥг семьяын куинь нылпи ке, куинез ик мынам классам шедьылӥзы», - шуэ со. Со дыр ӵоже, покчи классъёсты дышетон сяна, А. Шакирова пионервожатой но, организатор но, директорлэн советникез но луыса ужамын. Туэ одӥг пиналэн гинэ ужа, со – тьютор.

Л. Н. Толстой гожтэм: «Дышетӥсь быръем ужзэ но нылпиосты огвыллем юн яратэ ке, со - зэмос дышетӥсь». Та кылъёсын ик Аниса Сахиповна сярысь но вераны луэ. Солэн небыт куараяз, синъёсаз – шунытлык. Соос котькинэ бордазы кыско.

Зӥбыт, лякыт сямо кышномуртлэн быръем удыссэ мур гажамез вераськыку ик шӧдӥське – дышетэм нылпиосыз, соослэн вормонъёссы сярысь веракуз, синъёсаз яркыт тылсиос ӝуатско, кожалод. Аниса Сахиповна котькуд пинал бордысь ӟечсэ, солэсь быгатонлыксэ адӟыны тырше. Кыӵе ке устолыксэс шарая ке, сое одно ик волятон, нылпи сюлэмъёсы асьсэлэн быгатонлыксылы оскон пыӵатон сярысь сюлмаське.

- Котькуд нылпи таланто луэ. Сое шӧдоно, адӟоно, котькудзылы «усьтон» шедьтоно, - шуэ А. Шакирова. - Зэм, котькуд пинал «ньыльлы» но «витьлы» гинэ уг дышетскы. Соин ик мон лябгес дышетскисьёсты умой дышетскисьёсын артэ пуктӥсько вал. Сыӵе амал ужам туж юрттылӥз. Дышетскон ар пумозь классысь нылпиос ваньзы огвыллемгес луо. Ог-огзылы юрттон мылкыдзы но пуроме.

(Быдэсак лыдӟе газетлэн 39-тӥ номерысьтыз).