Школае ӧтёз жингрес чингыли

Татышлы ёросын 22 школа, 24 нылпи сад но ватсаса тодон-валан сётон кык юртъёс лыдъясько. Туэ школаосы 2531 дышетскисьёс мынозы. Соос пӧлысь 60 процентэз выльдэм, тупатон ужъёс лэсьтэм школаосын дышетскозы. Таӵе лыдпусъёсын кенешонын тодматӥз Татышлы ёрос администрациен кивалтӥсь Фанур Шайхисламов. Озьы ик бадӟым ужрадэ пыриськизы Башкортостанысь экологияя но инкуазь ваньбурен пайдаяськонъя министрлэн воштӥсез Камиль Биргулиев, Кун Собранилэн-Курултайлэн депутатэз, «Танып» санаторийлэн директорез Кашшаф Ямалетдинов, ёросысь дышетонъя ёзэтэн кивалтӥсь Рулан Бадертдинов. Соос дышетон удысын тыршисьёслы выль дышетскон арын вормонъёс, усто дышетскисьёс но ваньзэ умойзэ сӥзизы.

Дышетӥсьёслэн кенешонзылэн кыкетӥ люкетэз ӟечкыланъёслы сӥземын вал: школаослэн учебно-опытной участокъёссылы сӥзем смотр-конкурслы, дышетон юртъёсты, нылпи садъёсты выль дышетскон арлы дасянлы, школаосысь спорт клубъёслэн спартакиадазылы, дышетон удысын ужасьёслэн «Здоровье» спартакиадазылы йылпумъянъёс лэсьтӥзы. Школаосты выль дышетскон арлы дасянын вормисьёс пӧлын луизы удмурт гуртъёсысь тодон-валан сётон юртъёс но. Тау карон гожтэтлы кузё луизы Арибашысь, Калмиярысь школаос, Улысь Балтачысь нылпи сад, основной школаос пӧлын вормисе потӥз Уразгильдыысь школа.

Туспуктэм вылын: Ф. Шайхисламов Уразгильды школалэсь директорзэ И. Минязевез ӟечкыла.