Шутэтско, дышетско, трос визьнод люкало

Соос школалэн бурд улаз кариськемзы дырысен дошкольной группаен кивалтэ школалэн директорез Регина Кочурбаева.

Пичиосты дышетон, соослы визьнод сётон сярысь сюлмаське Лариса Миншарапова. Быръем удысаз со 25 ар ӵоже тырше ни. Со сяна, пичильтык дуннеын ужало воспитательлэн юрттӥсез Вероника Гильматдинова но пӧзьтӥськись Марина Шарафисламова. Соос пиналъёслэн котькуд нуналзы тунсыко, пайдаё мед ортчоз шуыса сюлмасько.

Кылем арняын зангариослэн арнязы тунсыко ортчиз. Со «В мире профессий» нимаськиз. Арня ӵоже нылпиос пӧртэм удысъёсын тодматскизы. Воспитательзы соосын «Кем ты хочешь стать?», «Что такое трудолюбие?», «Что такое лень?», «Кто работает у нас в детском саду?» темаосъя вераськиз. Пичиос уж сярысь веросъёс, кылбуръёс лыдӟылӥзы.

Нылпиослы тужгес кельшиз экскурсиосы потан: соос гуртысьтызы библиотекае, ФАП-е вуылӥзы. Со сяна,  трос тодӥзы дышетӥсьлэн, пӧзьтӥськисьлэн ужзы сярысь. Озьы ик пиналъёс доры куное вуылӥзы пӧртэм интыосын ужась анай-атайёссы – поездысь проводник, полицейской. Ӧнеръёслы сӥзем арня улсын пичиос ролевой шудонъёсын – «Строители», «Я - доктор», «Я - парикмахер», «Я - шофёр», «Магазины «– шудӥзы.

Удысъёслы сӥзем арнязэс йылпумъяса, соос пӧзьтӥськон удысэз ас вылазы веръязы – школаысь столовойын винегрет лэсьтӥзы. «Уж борды кутскемлэсь азьло, нылпиосын вань куронъёсты тодазы ваимы. Пуртэн сак выроно, пӧзем бакча сиёнъёсты дыртытэк вандылоно шуыса вераським», - гожтэ воспитательзы.

Пичильтыкъёслэн арнязы пайдаё ортчиз.

Фото: ДОШКОЛЬНАЯ ГРУППА при МБОУ ООШ с.Каймашабаш