«Анай кыл - тужгес матысез, лул но сюлэм пушкысь потӥсез»

Зинаида Пукроковна Зайнуллина, вордскемын Татышлы ёросысь Калмияр гуртын. Йылпумъям Удмуртиысь Яр педучилищеез, бӧрысь УдГУ-ын вылӥ тодон-валан басьтэм. 1987-тӥ арысен улонэз ёросысьтызы ик Выль Татышлы гуртэн герӟаськемын. Нырысь ужам сельсоветын  секретарь, собере «Дэмен» колхозын  экономист  луыса. Школае выжемез дырысен 27 ар луоз ни. 18 арзэ удмурт кылъя но литературая урокъёсаз анай кыллы но литературалы гажан мылкыд пыӵатэ. Кема аръёс  ӵоже директорлэн воспитательной  ужъёсъя воштӥсез  луыса ужаз. Туннэ  нуналэ со вылӥ  категориен дышетӥсь. Пусъемын ёрос, республика но РФ грамотаосын. Арлы быдэ пиналъёсыз пырисько  но вормисе потыло республиканской олимпиадаосын.

- Зинаида Пукроковна, мар со тӥ понна анай кыл?

- Анай кыл мон понна - тужгес но матысез, лул но сюлэм пушкысь потӥсез. Та кылын гинэ мон быгатӥсько быдэсак пуш дуннеме усьтыны но матысь адямилы вазиськыны.

- Анай кылэз дышетон удысын кыӵе югдур али?

- Уроклэн валтӥсь куронэз  туннэ нуналын - пиналъёсмы мед быгатозы чебер удмурт кылын шара вераськыны, малпаськыны анай кылынызы. Пинал урокын кылзӥське но, ваньзэ валаса, умой оценка басьтэ ке, солы дышетоно  предмет но, дышетӥсь но котьку кельшозы.

- Кыӵе ужпумъёсын пумиськоно луиськоды ужады?

- Ужпумъёс кылдо ке, ми соосты ёросысь удмурт кылэз дышетӥсьёслэн огазеяськоназы эскериськом. Сюлмаськытэ анай-атайёслэн пиналэнызы ӟучен вераськемзы,  нылпи садысен лыктэм  пиналъёслэн   ӟуч кылын вераськемзы. Федерал катэ (законэ) воштӥськонъёс пыртэм бере часъёсмы кулэсмизы. Программной материалэз вакчиятоно луиськомы, соин ик нылпиос куд-ог темаез, оло, валатэк но кылё, дыр.  Огдыре со шуг-секытьёс кылдытэ.

    Озьы ик ФГОС стандартъя дасям выль учебникъёсын  трос валантэм кылъёс пумисько, тужгес но «Удмурт кыл» книгаын. Выль кылъёс тодосчиосын пыртэмын дышетӥсьёслэн но нылпиослэн  йырвизязы  пумен (постепенно) пыӵатон вылысь.  Туж секыт со, веранэз ӧвӧл. Существительноез  «макеним», суффиксэз «кылӥтэт» шуон, глаголэз «каронкыл» йырез но, кылэз но тӥя. Вераськонамы трос диалектной кылъёс пумисько. Соин пинальёс сурасько. Но таӵе югдур программаез воштон  сярысь юан медаз кылдыты. Берло дыре выль учебникъёс выль ФГОС-ъя бертылӥзы, но соос котькуд школалы, классъёслы тырмыт ӧвӧл.

- Пичи классэн-а капчигес ужаны, трос нылпиосын-а?

Классын трос ке пинальёс, ужаны капчи. Туркымен-туркымен (группаен) ужаса пиналъёс ог-огзэс гажаса но валаса ужаны дышо, ог-огзэс кылзыса анализ но огъян лэсьтыны, ас малпанзэс валамон, оскымон вераны, мукетъёсызлэсь верамъёссэс кылзыны дышо.

- Котькуд уроклы-а план дасяськоды? Опыт луэмъя сотэк но ужаны уг луы-а? Яке со уроклэн тужгес валтӥсь куронэз?

- Котькуд уроклы план гожтӥсько.  Бен, чаклам планъя гинэ урок уг ортчы. Пинальёс  туж тунсыкоесь, йыразы олокыӵе малпанъёс-юанъёс лыкто, туж паймыто веранъёсынызы. Куддыр адӟисько: ужаны чик мылкыдзы ӧвӧл кадь, яке произведениез лыдӟиллямтэ. Сыӵе дыръя урокын ик маке выльзэ малпасько, озьы шуак выль сюжет кылдэ.

- Вань-а удмурт кыллэн вуоноез? Кыӵеен тӥ сое адӟиськоды?

- Удмурт кыллэн вуоноез вань. Тросэз туала улонмы бордысь потоз, солэн туала факторъёсыз бордысь: анай-атайёс пиналъёсты удмурт кыллы дышето-а, уггес-а, верасько-а удмурт пиналъёс куспазы удмурт сямен. Кызьы бадӟым общество удмурт кыл шоры учке: гажаса яке гажатэк? Тросэз адямиослэн мылкыдзы бордысь но потоз. Ог-огмес  гажаны но дунъяны  быгатӥмы ке, кылмылэсь уз но палэнске. Ассэ гажась адями анай кылызлэсь уз палэнскы, мурт кылэ уз выжы. Озьыен, али валаны кулэ, удмурт кыл мукет кылъёслэсь номырин но уродгес яке начаргес ӧвӧл. Туала улонын удмурт кыл пиналлы ватсаса луонлыкъёс сётэ, тросгес ӧсъёс усьтэ, дуннеез турлыгес возьматэ.

Вакчи юан-вакчи веран:

- Ма бордысен кутске ӵукна нырысетӥ урокты? Ӟечбуръяськиськом но вакчияк куазь сярысь вераськиськом.

- Кыӵе удмурт сиёнэз яратӥськоды? Пӧртэм пушкесэн перепеч. Тужгес губиен пӧраны яратӥсько.

- Удмурт дӥськут – со …удмурт калыклэн ымнырыз. Мон аслым кыкетӥзэ удмурт дӥськут вурытӥ ни.

Удмурт сям - … Сямзыя асьме удмурт калыкмы котьку визьмо, ужась, сюлмаськись, возьдаськись. Сюлэмзы ӟеч калыклы котьку ӟечен усьтӥське. Тодмо-а, ӧвӧл-а, гажаса пырисьлы вӧйын нянь пуктӥськом котьку. Зэмос удмурт сямен, мон вожъяськисько. Вожъяськисько тодмоосылы, куке соос быгато, мае мон уг

быгатӥськы. Кас мылкыдын уг, соос понна шумпотӥсько.

Удмурт яке ӟуч кырӟанъёсты яратӥськоды? Бигер кылысь удмуртэ берыктэм кырӟанъёсты. Удмуртъёслэн бигеръёслэн кадь сюлэмез позыртыса пушке пырись кырӟанъёссы ӧвӧл.

Яратоно кылбурчиды яке писательды. Флор Иванович Васильев. Ф. Васильевлэн  кылбуръёсыз тросэз сӥземын инкуазез, анай кылэз утёнлы. Туннэ нуналын со туж кулэ луись темаос.

Удмурт йылолъёс - … Мон соосты утисько, чакласько. Нылпиосме соослы дышетӥсько.

Тау, Зинаида Пукроковна. Вераськонмы тунсыко пӧрмиз.