+1 °С
Лымы
Антитеррор
Вань иворъёс
Дышетон
5 Октябрь 2022, 10:00

Дышетӥсь бордын визьнод, шунытлык но лякытлык

Дышетӥсь. Макем бадӟым кыл. Улонын котькыӵе воштӥськонъёс луизы ке но, дышетӥсьлэн нимыз котьку улоз. Сое аръёс ӵоже дышетэм пиналъёсыз утёзы.

Дышетӥсь бордын визьнод, шунытлык но лякытлык
Дышетӥсь бордын визьнод, шунытлык но лякытлык

Янаул ёросысь Каймашабаш школаысь дышетӥсь Ольга Давлетова аслыз ӧнер анаезлэсь адӟем карыса быръем. Роза Рахимзяновна кема аръёс ӵоже Вуж Вараш школаын дышетэм. Солэн ужез Россиысь калыкез дышетонъя отличник гадьпусэн пусъемын. «Анай дышетскисьёсызлэсь тетрадьёссэ эскерыны котьку доре вайылӥз. Мон анаен ӵош учкисько вал. Мыным «кыкъёслы» дышетскись пиналъёслэн тетрадьёсысьтызы янгышъёссэс утчаны кельше вал. Озьы асме визьмогес кожасько вал, дыр. Нош али умой дышетскись пиналъёслэсь тетрадьёссэс, ужъёссэс эскерыны яратӥсько. Пичиысен дышетӥсьлэсь ужзэ адӟыса-тодыса будӥ, анаелэн пытьытӥз ик вамыштӥ», - вера О. Давлетова. Ольга Рахимзяновналэн ӵужаез но дышетӥсь вылэм.

Ольга Давлетова 1996-тӥ арысен Каймашабашысь школаын ужа. Нырысь со ӟуч кылъя но литературая урокъёсты нуэм, собере - удмурт кылъя но литературая урокъёсты. Али Ольга Рахимзяновна ёросысьтызы удмурт кылъя дышетӥсьёслэн методической огазеяськонэнызы но кивалтэ. Со УдГУ-ын удмурт филологияя факультетын тодон-валан басьтэм.

- Мынам специализацие журналистика вал. Огдыре журналист луон малпанэн но улӥ. Практикаосты радиоын но «Янаульские зори» ёрос газетын ортчылӥ. 1995-тӥ арын Каймашабаше бызи но уж сюресэ гуртысь школаен герӟаськиз, - вера О. Давлетова.

Ольга Рахимзяновналэн дышетэм пиналъёсыз пӧртэм конкурсъёсы, олимпиадаосы пырисько, ӵемысь вормонъёслы кузё луо. Дышетскисьлэн вормонэз дышетӥсь понна шумпотон, солэн ужезлы аспӧртэм дунъет выллем луэ. О. Давлетова ачиз но конкурсъёсы, ужрадъёсы ӵем пыриське. Кылсярысь, 2018-тӥ арын «Арлэн дышетӥсез» ёрос конкурсын быгатонлыкъёссэ эскериз. Со бадӟым вормонлы кузё луиз – Гран-при басьтӥз.

Туэ 9-10-тӥ куарусёнэ Уфаын анай-кылъя но литературая дышетӥсьёслэн, воспитательёслэн регионъёс куспысь форумзы ортчиз. Отчы огъя 280 адями пыриськиз: Башкортостанлэн пӧртэм ёросъёсысьтыз сяна, Татарстанысь, Пермь шаерысь, Оренбург улосвылысь дышетӥсьёс вуэмын вал. Ольга Давлетова но соос пӧлын луиз. Форумысь Ольга Рахимзяновна бадӟым шумпотонэн бертӥз. Солэсь ужзэ «Отличник образования РБ» гадьпусэн дунъязы.

Зэм, дышетӥсьлэн ужез капчи ӧвӧл. Но выль вормонъёс азьлань вамыштыны юртто. Уждэ дунъяло бере, йырын выль малпанъёс вордӥсько, дышетскисьёсты выль ужрадъёсы, конкурсъёсы, олимпиадаосы дасяны мылкыд бурдъяське.

Автор:Миляуша Булатова
Читайте нас: