-3 °С
Салкым
Антитеррор
Вань иворъёс
Дышетон
6 Куарусён 2022, 16:35

Выль дышетскон арез выль вормонэн пумитаз

Дышетон удысын тыршисьёс выль дышетскон арез выль вормонъёсын пумитазы. Татышлы ёросысь Вылысь Татышлыысь ДЮСШ-ысь тренер  Ильгиз Шакиров но соос пӧлын луиз. Ильгиз Миннихановичез егитъёслы шаерез гажан мылкыд пыӵатэмез понна Россиысь «Общественное призвание» национальной фондлэн медаленыз пусйизы. Ӵектӥськом тодматскыны редакцилэн архивысьтыз материалэн. И. Шакиров сярысь гожъямы газетмылэн 2013-тӥ арын южтолэзе потэм одӥгаз номераз.

Выль дышетскон арез выль вормонэн пумитаз
Выль дышетскон арез выль вормонэн пумитаз

Бадӟым вормон тыршытэк уг вуы
Кема ӧвӧл школаын дышетскисьёс пӧлын баскетболъя республика спартакиада ортчиз. Вылысь Татышлыысь ДЮСШ-ысь пиослэн командазы отысь чемпион нимен берытскиз. Спортсменъёсты республика чемпионатэ тренерзы И. М. Шакиров дасяз.
Ильгиз Минниханович Шакиров пичиысен спортэн тунсыкъяськем. Школаын дышетскыкуз со олокӧня спорт видъёсъя чемпион вылэм: шашкиен, шахматэн, ӝӧквыл теннисэн усто шудэм, баскетболэ, волейболэ, футболэ ветлэм. Полиатлонын, хоккейын, ыбылӥськонын, капчи атлетикаын но спортсмен висъяськем. Гир ӝутканлэсь но со палэнскымтэ, вакытаз аслаз весовой категорияз чемпион вылэм.
- Спортэз гажаны мон агайёсылэсь дышиськем, лэся. Альфред агае киен (рукопашной) нюръяськонэн тунсыкяськиз. Ильхам агае баскетболэ ветлӥз. Солэсь адӟем карыса, мон но баскетболэз бырйи, - тодаз вае И. Шакиров.
Быдэс ваньмон дырзэ спортъя залъёсын ортчытъям пияш, быдэ вуыса тунсыкъяськонзэ улоназ пыӵатыны малпам. 1987-тӥ арын школазэ йылпумъяса, со Свердловскысь дышетӥсьёсты дасянъя кун институтэ дышетскыны пырем, физкультурая факультетэз быръем. 1992-тӥ арын со аслаз тодон-валан басьтэм юртаз – Вылысь Татышлыысь кык номеро школае - берытскем. Татын солы физкультурая урокъёсты оскиллям. 2005-тӥ арын Ильгиз Минниханович баскетболъя тренер луыса ёросысь спортшколае ужаны выжем. Нырысь со нылкышноослэн командаенызы ужам. Соос республика ӵошатсконъёсы но вуылӥллям. Бӧрысь Ильгиз Минниханович пиосын ужаны кутскем. Со покчи классъёсын дышетскисьёcты быръем. Пичиысен спортын кыдамъёты азьпалан бадӟым вормонъёс витё, шуо. Соослэсь зэмос спортсменъёсты будэтыны малпам, лэся, тренер. Жадёнэз валатэк, ужезлы вань сюлэмзэ сётыса тыршемез аръёс ортчыса шумпотонъёслы пӧрмем. Пиос ёрос ӵошатсконъёсын котькинлэсь усто шудыса, зональной ужрадъёсы пыриллям. Отын но татышлыослы вуисьёс луиллямтэ. Озьы соос республика чемпионатэ шедиллям.
- Спартакиадае дасяськыку, тренировкаосын Казань сярысь кылпум ӝутӥмы. Пиослэн отысь УНИКС-лэн шудоназ вуылэмзы потэ вылэм. Чемпион нимез басьтӥды ке, отчы одно ик вуыломы шуыса оскытӥ мон командаысь пиосты, - вера Ильгиз Шакиров. – Сыӵе иворез кылыса, пиналъёс бурдъяськизы кадь. Чемпионатысь соос одно ик чемпион нимен берытскыны кыл сётӥзы. Озьы ик луиз.
- Нош Казане вуылӥды-а? – юасько тренерлэсь.
- Вуылӥмы. УНИКС-лэн суперлигаысь матчаз ми шедимы. Коньдон ласянь юрттэт возьматӥзы ёрос администрациен кивалтӥсь Р. К. Гараев, ёросысь дышетонъя ёзэтэн кивалтӥсь А. М. Фарвазетдинов, Вылысь Татышлыысь кык номеро школалэн директорез Р. А. Бадретдинов. Чемпионатысь вормыса бертэм бере, Р. К. Гараев командалы спортивной форма кузьмаз, Вылысь Татышлы гурт поселенилэн администрациеныз кивалтӥсь Р. Г. Ямилев пиосты коньдон премиен шумпоттӥз, - данъяськыса вера тренер.
Баскетболэз улоназы пыӵатэм пиос гужем но тунсыкъяськонъёссэс уг вунэто. Соос уличной баскетболын но устоос луо. Кылем гужем пиослэн командазы республикаын кыкетӥ интые потэм.
Улмопулэн улмоез кыз улэ уг усьы, шуо. Ильгиз Миннихановичлэн кык пиосыз но спортэн эшъясько. Бадӟымез пиез но школаын дышетскыкуз котьку ёрос, республика ӵошатсконъёсы пыриськем. Али Эдуард Екатеринбургысь уральской федеральной университетын дышетске. 9-тӥ классын дышетскись Эльдан чемпион нимен пусъем баскетболъя командаын шудэ.
Баскетболъя тренер хоккеен но тунсыкъяське. Ёросысь сборной командаын со защитник луэ. И. Шакировлэн кылъёсызъя, хоккен со пичи дыраз эшъяськем. Али но тодаз на, пе, эшъёсыныз шур вылын аслаз тупатэм клюшкаеныз бызьылэмез. Нош туала улонын пиналъёс клюшка тупатон сярысь уг но малпасько ни. Спортивной дӥськут, пыдкутчан, спорт тӥрлык сярысь сюлмаськонъёс вунэмын, шуыны луоз. Ваньзэ вузкарон юртъёслэн ӝажыосысьтыз шедьтыны луэ. Спортэн эшъяськыны мылкыдыд гинэ медло.
Туннэ нуналэТатышлы ёросын спортлы бадӟым саклык висъяськемез но пусъе тренер. Ӧнерчиос но пиналъёсты та удысэ кыскон бордын трос, пе, ужало. Зэм, татышлыос хоккейын но, баскетболын но, волейболын но, теннисын но, кус керттонэн нюръяськонын но висъясько. Егитъёслэн вормонъёссы соослэн дышетӥсьёссы, тренеръёссы бордын но.

Фото: Администрация Татышлинского района

Автор:Миляуша Булатова
Читайте нас: