Кытын кызьы шутэтско?

Япония

Япониын Тодон-валанлэн нуналэз – 1-тӥ оштолэзь. Нош дышетскон ар 1-тӥ южтолэзе йылпумъяське. Тросэз пиналъёс «шутэтсконзэс» тодон-валан басьтонлы сӥзё. Малы ке шуоно Япониын дышетӥсьёс каникулъёсы но нылпиослы заданиос сёто. Пиналъёс ваньмон дырзэс дорысь ужзэс быдэсъяса ортчыто.

Италия

Италиын пиналъёс куарусёнысен инвожо толэзёзь дышетско, куинь пол шутэтско: Рождество дыръя (кык арня), тулыс (одӥг арня) но гужем (куинь толэзь). Пиналъёслэн каникулзы ӵемысь анай-атайёссы вӧзын ортче.

Франция

Франциын школьникъёс араз вить пол шутэтско, национальной праздникъёсты лыдэ басьтытэк. Франциын анай-атайёс нылпиоссылэн умой дышетскемзылы бадӟым саклык висъяло. Соин тросэз пиналъёс каникул нуналъёссэс валамтэ темаоссэс дышетонлы, ватсаса тодон-валан басьтонлы сӥзё.

Испания

Испаниысь школаосы «гужем» вуэ 20-23-тӥ инвожое. Выль дышетскон ар куарусён толэзьлэн шораз кутске. Татысь пиналъёс дырзэс песяй-песятайзы, ӵужай-ӵужатайзы вӧзын ортчыто, анай-атайёссы ужало угось. Испаниын гужем лагерьёс - «кампаменто» - ужало. Соос шулдыр гурезё интыосы, зарезь дуръёсы интыяськемын. Отын нылпиосты национальной кырӟанъёслы, эктонъёслы дышето. Но тужгес бадӟым саклык висъяське кунгожсьӧр кылъёсты дышетонлы.

Австралия

Австралиын улӥсь пиналъёслэн гужем каникулзы одӥг толэзьлэсь тросгес кыстӥське. Вакчи дыр куспын школаын дышетскисьёс пӧртэм ужрадъёсы вуыло. Малы ке шуоно каникулъёс дыръя татын пӧртэм фестивальёс, спорт ӵошатсконъёс трос радъясько.

Туспуктэм вылын: Татышлы ёросысь Улысь Балтач школаын дышетскисьёс понна школа бордын гужем лагерь ужаз. 

Фото: МБОУ СОШ с. Нижнебалтачево