Шор ёзо школаен кивалтонэ нырысетӥ вамышъёс

- Спортсменъёсмы кужмоесь, - вера школалэн директорез Алина Шарафутдиновна Туктагулова.- Соос пӧртэм ӵошатсконъёсысь вормонъёсын бертыло.

Бадӟым Гондыр школа – Пермь шаерысь Куеда ёросысь удмурт гуртъёсысь одӥгез бадӟым тодон-валан сётон юрт. Татын 224 пиналъёс дышетско. Солэн Кипчакысь, Киргаысь структурной подразделениосыз но та ласянь лыдпусъёсын шумпотто: Кипчакын 60 нылпиос дышетско, Киргаын – 52. Нош куинь гуртъёсысь нылпи садъёсты ке учконо, отчы огъя 133 пиналъёс ветло. Зэм, нылпиослэн лыдӟы ӧжыт ӧвӧл ке но, Бадӟым Гондырысь  шор ёзо школаын 11-тӥ классы ӧвӧл. Соин школаен кивалтӥсьлэн туннэ нуналэ одӥгез бадӟымез сюлмаськонэз луэ шор ёзо школаез утён. Уго Киргаысь но Кипчакысь дышетон юртъёс основноен лыдъясько ни.

- Школаосын нылпиослэсь тодон-валанзэс будэтонлы, соосты визьноданлы трос саклык висъяськом. Дышетскисьёсмы пӧртэм творческой конкурсъёсы пыриськыло, исследовательской ужъёс бордын тыршо, проектъёс гожъяло. Соос пӧлысь тросэз удмуртъёсын, асьмелэн сям-йылолъёсынымы герӟаськемын. Со понна «История, культура удмуртского народа» учебникъёсмы но вань. Шумпотоно, Кипчакын но Киргаын фольклор ансамбльёс ужало шуыса. Отын музейёсмы но вань, - вера школаен кивалтӥсь. – Дышетӥсьёслэн тыршемзы юнме ӧвӧл, пиналъёсмы пӧртэм предметъёсъя олимпиадаосын но конкурсъёсын вормисьёс пӧлын луо.

Бадӟым Гондыр шор ёзо школаын пӧртэм кун программаосты но ужазы быгатыса куто. Кылсярысь, соос «Образование» национальной проектъя тупатӥськон ужъёсты быдэсто. Нош дышетӥсьёсты «Мобильный учитель», «Сельский учитель» программаосъя ужаны кутыны тыршо. «Дышетӥсьёсмылэн 80 процентэз вылӥ тодон-валанэн. Но, вераны кулэ, та ласянь но шугъяськонъёсмы вань. Дышетӥсьёс уг тырмо. Тужгес математикая, физикая, биологияя, химияя дышетӥсьёслы кулэяськиськом», - азинтэ веранзэ школаен кивалтӥсь. Нош директорлэн вуоноезлы малпанъёсыз сярысь ке верано, солэн бадӟым люкетэз школа борды выль корпус ӝутонэн герӟаськемын. Матысь дыре сое ӝутон борды кутскыны кулэ. 

Алина Шарафутдиновна Бадӟым Гондырын кема уг ужа на. Солэн уж сюресэзлэн бадӟым люкетэз Кипчак школалы сӥземын. Отын со кивалтӥсьын ужамын. Табере Алина Шарафутдиновналэн ныпъетэз куинь полэслы секытгес луиз, малы ке шуоно табере со куинь школа понна кыл кутэ. Кивалтӥсь шумпотэ, солэн структурной подразделениосаз оскымон адямиос ужало шуыса. Кипчакысь подразделениен Е. Ф. Минликаева кивалтэ, Киргаысь – С. Н. Шакирова.

Вераны кулэ,  подразделениосын «Ӟеч-а, бур-а, удмурт кыл» учебникен анай кылъёсъя урокъёс луо. Директорлэн кылъёсызъя, сое Бадӟым Гондыре но усьтыны луысал. Удмурт кылъя но литературая дышетӥсьёсын со пумысен шугъяськонъёс ӧй луысалзы. Со усьтон понна анай-атайёсын гинэ бадӟым уж нуоно.