+6 °С
Салкым
Антитеррор
Вань иворъёс
Дышетон
13 куартолэзе , 10:35

Сюлмызлы матын вордскем гуртэз, анай кылыз

Котькуд адямилэн сюлмызлы матын интыез луэ, кытын ошмес вуос но ческытгес пото, возьёс, лудъёс но чеберегес адско, чылкыт омырен шоканэз но капчи, бусыос но вӧлмытэсь, шунды сиос но яркытгес пишто. Со сыӵе инты, кытын малпаськыны но, пичи дыре берытскыны но луэ. Тамара Галяутдиновна Сайфутдинова понна сыӵе инты – со яратоно Канлы гуртэз.

Сюлмызлы матын вордскем гуртэз, анай кылыз
Сюлмызлы матын вордскем гуртэз, анай кылыз

Татын со вордӥськем, будэм, татын ортчиллям солэн школа аръёсыз. Татын ик со эшъяськонлэсь дунлыксэ валаны, бадӟымъёсты гажаны дышетскем, аслыз матысь эшъёс шедьтэм, семья кылдытэм. Татын ик вордӥськиллям солэн кык пиосыз. Туннэ нуналэ но Тамара Галяутдиновна вордӥськем гуртаз ик улэ. Удмурт калыкез понна сюлмаськыса ужа. Кышномурт бускель Ахметово школаын удмурт кылъя но литературая урокъёсты нуэ. Дышетон удысын Тамара Галяутдиновна 1988-тӥ арысен. Соку Канлыын шор ёзо школа вылэм. Жаляса верано, туннэ нуналэ гуртысь тодон-валан сётон юртлэн ӧсэз пыраклы пытсаськемын ни.

- 2012-тӥ арын школаямы тупатъян ужъёс лэсьтӥзы: липетсэ воштӥзы, пластик укноос пуктӥзы, ӧсъёсты выльдӥзы. Тодон-валан нуналэ покчи классъёсын дышетскисьёс (со дыре школамы начальной кылемын ни вал) выльдэм школае шумпотыса вуизы. Но сайкыт нуналэ ӵашъем кадь луиз, куке школамы ворсаське шуыса ивортӥзы. Дас кык нунал дышетскизы но, пиналъёс Ахметово школае выжизы. Ваньмызлы одӥг валэктон сётӥзы – дышетскисьёсмы, пе, ӧжыт, - вера Т. Г. Сайфутдинова.

Школаез йылпумъямез бере, Татьяна Галяутдиновна бухгалтерлы дышетскем. Быръем ӧнерезъя уж луымтэен, вить ар ӵоже гуртысьтызы клубын ужано луэм, кивалтӥсь луыса. Собере ини сое улон сюресэз школае, пиналъёс доры, вуттэм.

- Школаын ужаны кутскем бере, УдГУ-э филология факультетэ дышетскыны пыри, заочно дышетски. 2004-тӥ арын диплом басьтӥ., - вера дышетӥсь. – Нырысь мон удмурт кылъя но литературая урокъёсты нуисько вал, Ахметово школаын ужаны кутскем бере, ӟуч кылъя урокъёсты но нуыны кутски.

Зӥбыт сямо, дышетскисьёсыз азе юн куронъёс пуктыны быгатӥсь дышетӥсь быръем ужзэ гажа, сюлмысьтыз тырше, школалэн азинсконаз аслэсьтыз бадӟым люкетсэ пыртэ. Солэн дышетэм пиналъёсыз ёрос но республика конкурсъёсы пырисько, призо интыослы кузё луо. Кылсярысь, «Пою мою республику» сочинениосъя конкурсэ пыриськемъёс котьку данъян грамотаос, пе, басьто. Кема аръёс ӵоже тодон-валан сётон удысын тыршем дышетӥсьлэн аслаз но наградаосыз трос люкаськемын ни. Соос пӧлын Башкортостанысь Дышетонъя министерстволэн Данъян грамотаез но лыдъяське.

Котькуд адямилэн, сюлэмызъя быръем ужез сяна, нимысьтыз тунсыкъяськонэз, хоббиез, луэ. Ваньмон дырыз луыку маин меда выре Тамара Галяутдиновна? Кема тунатэк та юанлы нокин шонер вераны уз быгаты – со чорыганы яратэ. Шур дурын со шутэтске но, малпаське но, выль ужъёс борды басьтӥськыны кужым но люка. Кутылэм чорыгъёсыныз дорысьёссэ шумпоттэ, матысьёссэ но эшъёссэ ӵемысь, пе, куноя.

Автор:Миляуша Булатова
Читайте нас в