Студент: кызьы сётӥсько солы дышетскон но улон

"Студент" кыл пӧрмемезъя латин кыл луэ (studens — зол ужась, тыршись). Студент - со школаез йылпумъям нылпи, кудӥз соку ик ужаны кутскон интые аслыз эшшо одӥг йыр висён яке дышетсконэз быръе. Куд-ог дыръя дышетскыны пырон пиосты армие мынонлэсь но утьыны быгатэ, куддыръя со но уг юртты.

Лусьтро йырсиен, тӧрнам синъёсын, пельёсаз наушникъёсын, вамышъякуз ик маке ымаз тырись егит пиез пумитады ке, со - студент. Куддыръя соос параос интые но ульча кузя лошъяськыны быгато. Нылмурт студентъёс умойгес но чебергес адско, параосы но ветлыны тыршо - "автомат" басьтон понна.

Бадӟым городъёсын улӥсь толло школьникъёслэн ӝоггес нимаз улэмзы потэ. Соин соос мукет интыосысь вузъёсты быръё. Но ӵемысь пырыны быгато асьсэ городысьтызы дышетскон юртъёсы гинэ но улоно луо озьы ик анай-атайёсынызы ӵош. Удалтэгес та ласянь пичи городъёсын но гуртъёсын улӥсьёслы. Соос пыро дышетскыны бадӟым городъёсысь вузъёсы но доразы шер-тур гинэ бертало, коньдонзы бырыку яке туж зол мӧзмо ке. Сыӵе студентъёслэн огъяулонниосын - общежитиосын - улонзы сярысь вераса но уд быдты, малы ке шуоно студент улонын со валтӥсь инты басьтэ: ӵош пукыса вераськонъёс, чай юонъёс, уин дас кык час бере кӧт сюманы кутскон но картофка пырсатыса сиён. Соин городын асьсэ коркаосазы яке квартираосазы улӥсь эшъёссы общагаын улӥсьёслы туж вожъясько но ӵемысь соос доры куное вуыло.

Семестрлэн пумыз - студент понна тужгес кышкыт но трос ужан вакыт. Кин ке соку гинэ учебникъёсты нырысьсэ учке яке дышетскыны ветлэмъёслэсь лекциоссэс куре. Сессия дыръя студентлэн улонэз суткаяз 24 час кыстӥське. 2-3 арня ӵоже озьы: зачёт яке экзамен сётэмын ке, кӧня ке изид но, азьлань - мукетыз борды кутсконо. Общежитие борддоръёс вискын кӧня шпаргалкаос гожтэмын но кыӵе гинэ выль амалъёс кылдытэмын ӧвӧл соосты экзаменэ пыртон понна. Валтӥсез - поттыны мед быгатод но экзамендэ умой сётыны мед пӧрмоз.

Ма сиё студентъёс? Гуртысьтызы ваем сиёнзы ӵемысь кык-куинь нуналлы сяна уг тырмы. Общагалэн катэз - луэменыз вӧзысь адямиеныд люкиськоно. Тужгес тае уж вылын пиос эскеро. Арнянунал ӝыт яке вордӥськонэ огъяулонниысь тодмо нылъёс дортӥ ортчид - кӧтыд тыр. Куддыръя кухняын пӧзись сиён но ышыны быгатоз. Зэмзэ вераса, макарон басьтыны котькудӥз студент быгатоз, дыр.

...Студент улон - шулдыр улон. Тодон-валан но басьтӥськод, улыны но дышетскиськод, нырысетӥ яратонэн герӟаськем шудо минутъёс но, со понна бӧрдонъёс но та дыре тупало. Со дыр туж ӝог ортче, озьы ке но котькудӥзлэн улоназ мур пытьы кельтэ. Студентъёслэн нуналэнызы, туала но вуж студентъёс.

Туспуктэм интернетысь басьтэмын.