Дышетскон юртъёсмы кужмо ӧнерчиосты дасяло

Ӟеч тодон-валан басьто
Азьвыл аръёсы егитъёс республикамылэн палэнысьтыз дышетскон юртъёсты бырйылӥзы. Устоосыз дышетскисьёс шоркарамы кошкон сярысь сюлмаськизы. Соос малпазы, бадӟым городын ӟеч тодон-валан басьтозы шуыса. Но аръёс возьмато: республикаысьтымы вылӥ дышетскон юртъёслэн сётэм тодон-валанзы куддыр шоркарынлэсь но вылӥын. Со тужгес мувӧй поттон удысын шӧдӥське. Асьмелэн ӧнерчиосмы шаермылэн пӧртэм сэрегъёсаз ужаны интыяськонэн шугъяськыса уг уло.
Кужмо ӧнерчиос луо
Республикаысьтымы бадӟым предприятиос кемаласен ни шӧдӥзы, усто ӧнерчиосты дасян бордын аслыд ужано шуыса. Соин соос студентъёсты практикае шумпотыса куто, кунгож сьӧры стажировкаосы келяло. Озьы егитъёс дышетсконзэс йылпумъятозязы кужмо ӧнерчиослы пӧрмо.
Дорлы матын
Берло толэзьёсы кылдэм югдур возьматэ: республикамылы эмчиос но волонтёръёс кулэ. Нош «блогеръёстэк» но «кизилиостэк» улыны быгатомы. Коронавирусэн герӟаськем югдур азьланяз кызьы азинскоз, тодмо ӧвӧл на. Нош туннэ самолётъёс но пыр-поч уг лобало, вакциналэн ӟечлыкез но тодмо ӧвӧл. Соин та вакытэ асьмелэсь тазалыкмес, улонмес утёз яратоно дормы – Башкортостан Республикамы.
Дунтэм
Шоркарысьтымы вылӥ дышетскон юртъёс семьялэсь коньдон пуйызэ трослы бушатозы. Сюрес вылэ, квартиралы, сиён-юонлы ӧжыт коньдон кулэ ӧвӧл угось. Нош республикаямы соос шӧдскымон дунтэмгес. Куддыр анай-атайёс автобусъёс сьӧры но нылпиоссылы, кылсярысь, бакча сиён лэзьыны йӧндыро. Нош Москвае сыӵе салам келяны пӧрмытозы меда соос?
Кызьы ортчозы экзаменъёс
Россилэн Президентэзлэн Владимир Путинлэн указэзъя, туэ вылӥ дышетскон юртъёсын ватсаса 30 сюрслэсь трос выль бюджет интыос кылдозы.
Нырысетӥосыз огъя кун экзаменъёс куинетӥ пӧсьтолэзе ортчозы. Пиналъёслэсь литературая, географияя, информатикая визьзэс сыналозы. Берпуметӥосыз экзаменъёс 25-тӥ пӧсьтолэзе луозы. Кинъёс пӧртэм мугъёсын пӧсьтолэзе экзаменэ вуыны ӧз быгатэ, соос гудырикошконэ экзаменъёс пыр потозы. Озьы соос сӥзьыл вылӥ дышетскон юртъёсы пырыны быгатозы, быдэс арзэс ыштытэк.
ЕГЭ-лэн кыкетӥ тулкымез 3-8-тӥ гудырикошконэ луоз.
Дышетскисьёс тодон-валанзэс вылӥ дышетскон юртъёсын будэтыны уг малпало ке, огъя кун экзаменъёсты сётытэк но быгатозы. Аттестатъёсазы урокъёсын басьтылэм оценкаоссэс пуктозы.
Вылӥ дышетскон юртъёс студентъёслы ӧсъёссэс 20-тӥ инвожое усьтозы. Приёмной комиссиос 17-тӥ гудырикошконозь ужалозы. Отчы ужкагазъёсты онлайн амалэн но келяны луоз.
Дышетскон юртъёс нырысетӥ куарусёнысен ужаны кутскыны малпало.
Экзаменъёс азьын кызьы
буйгатсконо?
- Эн малпалэ, тӥляд улонады экзамен котьмалэсь дуно шуыса. Син азяды пуктэ таӵе суредэз: тӥ экзамендэс сётыны ӧд быгатэ. Мар со бере луоз? Тӥ улон юрттэк кылёды яке ужаны интыяськыны уд быгатэ? Эн кышкалэ, экзамендэс сётыны ӧд ке но быгатэ, улонды азинтӥськоз.
- Экзамен азьын ӝытазе книгаос борды эн кутске. Йырвизьды мед шутэтскоз.
- Эн юэ буйгатӥсь эмъюмъёсты – малпаськыны уд быгатэ ни. Экзаменъёсты азьын ульчаын шутэтскыса, ӟеч кӧлыса умой луоз.
Вуоно географ
Туэ Бурай ёросысь Касияровоысь Ренат Садыков но огъя кун экзаменъёс пыр потоз. Со Выль Тазлар школаез йылпумъяз. Дышетсконзэ республикаямы ик азинтыны малпа. «БГУ-э пырыны дасяськисько, - вера со. - Мукет регионэ ке интыяськид, дор палъёсы но ӵемысь бертылыны уг луы. Нош татын гуртэлы туж кыдёкын ӧвӧл». Со сяна, Ренатлэн апаез но БГУ-ын ик дышетске.
Ренат Садыков куке но программист луыны малпа вал. Нош табере солэн мылкыдыз воштӥськем, географической факультетэ, пе, документъёсме сёто. Нош али со огъя кун экзаменъёсы дасяське.
Дасяз Ольга
НИГАМАТУЛЛИНА.