Нылпилэн тазалыкез котьмалэсь дуно

Тазалык дуногес
Укмысэтӥ классэз йылпумъясьёслы зол удалтӥз. Туэ соос ньыль экзамен сётыны кулэ вал. Но Россиысь Дышетонъя министерствоын шуизы: «Нылпиос валтӥсь предметъёссыя (ӟуч кылъя но математикая) гинэ экзамен сётозы». Нош собере малпанзы выльысь воштӥськиз. Озьыен, туэ укмысэтӥ классэз йылпумъясьёс ОГЭ пыр уз ортче. Нылпилэн тазалыкез котьмалэсь дуногес. Табере пиналъёслы оценка пуктыкузы, соослэсь быдэс ар ӵоже дышетскемзэс учкозы.
Огъя кун экзаменъёс
сярысь
Тужгес секыт югдур кылдэмын 11-тӥ классэз йылпумъясьёсын. Россиысь Дышетонъя министерствоын таӵе малпанэ вуизы:
- Дышетскисьёс огъя кун экзаменъёсты берлогес сётозы. Экзамен сётон нуналъёсты коронавирусэн герӟаськем югдурез лыдэ басьтыса быръёзы. Россиысь дышетонэз эскеронъя федерал службалэн азьпалтыса сётэм иворезъя, огъя кун экзаменъёс 19-тӥ инвожоын кутскыны быгатозы. Нош коронавирусэз матысь дыре вормыны ӧз быгатэ ке, экзамен сётон дыр пӧсьтолэзе-гудырикошкон толэзьёсы выжтӥськоз, вуоно дышетскон арлэн кутсконэз – 1-тӥ коньывуонэ. Россиысь тазалыкез утёнъя министр экзаменъёсты гудырикошкон-куарусён толэзьёсы выжтон сярысь но кылпум ӝутылӥз ни.
- ЕГЭ котькуд регионын одӥг нуналэ ортчоз.
- Туэ ӟуч кылъя но математикая огъя кун экзаменъёс уз луэ. Аттестатэ оценкаос ар ӵоже дышетскемзэс учкыса пуктозы. Нош вылӥ дышетскон юртъёсын тодон-валан басьтыны мылкыд карись пиналъёс асьсэлэн быръем предметъёссыя гинэ огъя кун экзамен сётозы. Вылӥ дышетскон юртъёсы документъёсты гудырикошкон толэзе дистанционной амалэн кутозы.
- Роспотребнадзор коронавирус вакытэ экзаменъёсты радъясьёс азе таӵе куронъёс пуктэ: экзаменэ пырисьёслэсь температуразэс мертано, висъетъёсты дизенфицировать кароно, тӧлатоно, пиналъёсты ог-огзылэсь кыдёкегес пуктоно.
- Коронавирусэн герӟаськем югдур ӧз воштӥськы ке, экзаменъёсты дистанционной амалэн ортчытыны быгатозы.
Берпуметӥ гырлы жингыртоз-а?
Башкортостан Республикаысь дышетонъя министрлэн нырысетӥ воштӥсезлэн Ильдар Мавлетбердинлэн верамезъя, нылпи садъёсын но школаосын берпуметӥ гырлы 29-тӥ куартолэзе жингыртоз. Но, Москвалэн ӵектэмезъя, праздник дистанционной амалэн ортчоз. Озьыен, пиналъёс кафеосы но мукет со выллем интыосы люкаськыны уз быгатэ – эшъёсынызы компьютер, телефон пыр гинэ вераськозы.
- Ми городъёсы но ёросъёсы онлайн-флешмоб но мукет ужрадъёс ортчытыны курыса гожтэтъёс келямы, - вера министрлэн воштӥсез.
Мар луоз вуоно
дышетскон арын?
Шаерысьтымы школаос усьтӥськемзы бере выль амалэн ужалозы. Роспотребнадзор со пумысен таӵе ӵектонъёс сётӥз:
- Нылпиослы кабинетъёссэс вошъятэк дышетсконо, нош переменаосты вань классъёслы огдыре кароно ӧвӧл. Пӧртэм классъёсысь пиналъёс ог-огенызы медаз пумиське.
- Кабинетъёсын ӵемысь дезинфекциос ортчытъяно.
- Школае пырисьёслэсь кизэс антисептикен миськонэз радъяно, пиналъёслэсь температуразэс мертано.
- Уж нуналлэсь радлыксэ эскероно, пӧртэм классъёс пӧртэм вакытэ дышетскыны мед кутскозы.
- Школаосын трос нылпиосын ужрадъёс ортчытоно ӧвӧл.
- Шулдыр куазен физкультурая урокъёсты педлон ортчытыны тыршоно.
* * *
Wanta Group исследовательской компания эскерон ортчытӥз. Юанэн вазиськем адямиос пӧлысь 49 процентэз шаерысьтымы югдур абитуриентъёслы уз юртты шуыса малпало.Нош 43 процентэз вылӥ дышетскон юртэ пырыны секыт луоз, шуо.
Дасямын «Республика Башкортостан» Издательской домлэн материалэзъя.