Вунонтэм командировка

Куке но мон Башкортостанысь удмуртъёслэн «Ошмес» газетсылэн редакцияз корреспондент луыса ужай. Огпол тодӥ: Австриын одӥгаз университетын ужась удмурт фольклорист-этнолог Татьяна Миннияхметова вордскем гуртаз, Байшадые, анаез доры куное бертэм. Кызьы, пе, сыӵе адямиен адӟиськытэк-вераськытэк, со сярысь газетэ гожтытэк? Кема малпаськытэк, валтӥсь редактормы доры пыри но командировкае куриськи.

Сюрес вылэ куинь кузя потӥм: редактормы, Лиана нимо кылкутӥсь секретарьмы но мон, Анна Байдуллина. «Командировкамы кык-куинь час сяна уз кыстӥськы», - малпай мон.

Байшадыын милемыз соку гинэ гурысь поттэм шаньгиен, ческыт шыдэн но пӧсь чаен куноятӥзы. Сиськон но интервью басьтон сямен дырлэсь ортчемзэ но ӧм шӧдэ. Ӝыт пал чилекъяса зорыны кутскиз. Кунокуа кышноосмы соку ик кушетскизы: «Кызьы бертоды на меда? Милям сюресъёс ведь сюресъёс кадь но ӧвӧл. Оло, кӧлыса гинэ кошкоды?»

Кӧлыны малы ке пумит луим. «Выль машинаен ӝог гинэ бертомы, ма милемлы таӵе гинэ зор», - сыӵе мылкыдын потӥмы сюрес вылэ. Кузё кышноослэн кылзы нырысетӥ иськемез ортчем берамы ик зэмаз: «асфальтсы» туж урод вылэм. Горд сюй вылтӥ машинамы кема ик мыныны ӧз чида, солань-талань ветлыны кутскиз. Ми Лианаен, гольык пыд кариськыса, сое бертӥз донгыны кутским. Донгаса-донгаса кыӵе ке гурт дорозь вуим. Тём-тём пеймыт вал ни. Редактормы трактор утчаны кошкиз. Ми – кык нылмуртъёс, кыӵе ке тодмотэм интыын, уйин, машинае кыкнамы гинэ кылимы. Кышкыт вал, али но тодам вайисько на. Сюрес урдсысь кыӵе ке куара кылыса, машиналэсь вань укнооссэ пытсамы, асьмеос шоканы дӥсьтытэк пукиськом, машина пушкысь тылэз но кысӥмы. Берло тодӥмы ни, милемыз гуртазы бертытэк кылем ыжъёс кышкатӥллям шуыса. Ярам, ӝоген юрттэт но вуиз. Трактор милемыз гравиен шобыртэм сюресозь вуттӥз. Солы но тау шуим ини. Но машинамы кыдёке ик мыныса ӧз вуы, бензинэз быриз. Озьы сюрес вылын уйез ортчытоно луиз. Соку сотовой телефонъёс ӧй вал на.

Ӵукна пал редактормы нош ик гурт пала вамыштӥз. Бензин шедиз, гуртысь гуртэ вузаськыса ветлӥсь вузчиослэсь одӥг сукыри няньзэс, колбасазэс но лимонадзэс басьтыса, кӧтмес тырим. Нош ик сюрес вылэ. Асфальт вылэ потэм берамы, мынам синкылиосме вормеме ӧз луы ни, ну бӧрдӥсько ук! «Малы бӧрдӥськод, Аннушка, ӝоген вуом ни ук», - лӥятэ монэ Лиана. «Шумпотыса бӧрдӥсько», - синву пыр серекъясько, - ваньмыз ортчемын ни шуыса».

Озьы кык-куинь часлы командировкамы быдэс уй но ӝыны нунал кыстӥськиз. Нош ветлэммылэн емышез быдэс полоса тыр «Ӝужытэсь-а Альпы гурезьёс яке наукае кузь сюрес» статья луиз.