Нылпиослы татын мӧзмыт ӧвӧл

Жаляса верано, гуртысь пиналъёслэн лыдзы кулэсмемен, 2013-тӥ арысен школаын покчи классъёсты гинэ дышето на. Туннэ нуналэ татын вить пиналъёс тодон-валан басьто. Соосты котькуд нунал шуныт пумита БР-ысь Дышетонъя министерстволэн данъян грамотаеныз пусъем но дас куинь ар ӵоже та школаен кивалтӥсьын тыршем Венера Хузягулова.
- Ваньмы одӥг висъетын пукиськомы, - вера Венера Миндияровна. – Нырысь таӵе амалэн ужан секытгес вал, али дыши ни кадь. Котькуд нылпилы нимысьтыз саклык висъяны тыршисько. Соос умой лыдӟиськыны, лыдъяськыны мед быгатозы шуыса сюлмаськисько.
Туэ школаез нырысетӥ классысен умой дышетскись пияш Амир Зиангиров йылпумъя. Вуоно дышетскон арез со Бурайысь гимназиын пумиталоз. Отын тодон-валан басьто бадӟым классъёсын дышетскись Мамадыысь пиналъёс. Нош гуртысь школае тямыс нылпиос вамыштозы. Соос пӧлын луозы али куинетӥ классын дышетскисьёс Аэлита Ахметшина но Алмаз Галиханов. Соос кыксы ик спортэн эшъясько. Со сяна, Аэлиталэн суредаськыны быгатонлыкез вань, чебер кырӟа, школаысь пичи библиотекаен кивалтэ на. Нырысетӥ но кыкетӥ классъёсы ветлӥсь Эвелина Галиханова но Айдамир Дюсметов бадӟымъёслэсь адӟем каро. Урокъёсты кельтытэк ӟеч дышетскыны тыршо. «Эвелина математикая кужмо. Со усто лыдъяське. Урокъёсын витьёс гинэ басьтэ», - вера дышетӥсьсы.
Венера Миндияровна вуоно аре школае вамыштӥсь пиналъёсын но ужаны дыр шедьтэ. Солэн кивалтэмез улсын подготовительной группае куинь нылпиос ветло. Анастасия Атнафикова, Павел Шаяхметов но Амир Дюсметов арняяз кык пол школае вуо. Татын соос лыдӟиськыны, примеръёс ужаны дышетско.
Пусйытэк кельтыны уг луы дышетскисьёслэсь лулчеберет удысын тыршемзэс но. Соос школаын сяна, клубын ортчись ужрадъёсы но мыло-кыдо пырисько. Тол келянлы, Выль арлы сӥзем но мукет сценарийёсын быгатыса шудо. Отын нылпиос гурт калыксылы шумпотон мылкыд кузьмало, оло, со понна ик «Дэмен» ООО-лэн кивалтӥсез Станислав Молодцов Выль ар азьын пиналъёсты кузьымъёсын - тюбингъёсын, вакчи куасъёсын, клюшкаосын, сноубордэн, ӝӧквыл шудонъёсын – но ческыт кампетъёсын данъяз.
Мамады школаын улон туннэ сокем зол уг ке но «пӧзьы» ни, дышетскисьёслы татын мӧзмыт ӧвӧл. Соос дышетскон юртазы дыраз мыно, урокъёссы бере доразы вамышто. Соин пичиослэсь анай-атайёссэс туннэ одӥг юан сюлмаськытэ: «Уз пытсалэ меда матысь дыре гуртысьтызы школазылэсь ӧсъёссэ?»

(Материал 2018-тӥ арысь 17-тӥ куартолэзе потэмын).