+19 °С
Салкым
Антитеррор
Вань иворъёс
Дышетон
19 февраль 2020, 14:30

Каймашабашын "Проектъёсъя мастерской" ужа

Янаул ёросысь Каймашабаш школаысь дышетскисьёс бадӟым уж борды кутскизы. Кылем арысен соос дышетӥсьёсынызы ӵош пӧртэм проектъёс гожъяло. Нош мар бордысен ваньмыз кутскем?

Татысь школаысь удмурт кылъя дышетӥсь Ольга Рахимзяновна Давлетова со пумысен вера: «Мон кемалась таӵе малпанэн улӥсько ни вал. Кылем арын Ижевскысь К. Герд нимо национальной гимназие «ШудКар» проектно-коммуникативной шудонэ вуылэммы бере, малпанъёсме быдэстыны луонлы осконэ кылдӥз. Татын ми трос пӧртэм юанъёсмылы валэктон шедьтыны быгатӥмы. Кылсярысь, тодӥмы, кызьы дасяно социокультурной проект, ужмес мед синйылтозы шуыса, азямы кыӵе ужпумъёс пуктоно. Школаысьтымы нылъёсмы шудонэ туж мыло-кыдо пыриськизы. Гимназиын дышетскисьёсын ӵош соос «Учись глазами» проект дасязы. Командаенызы Татарстанысь удмуртъёслэн валтӥсьсы Марина Иванова кивалтӥз. Дунъясьёслэн малпамзыя, проект вормисе потӥз. Со дырысен ми выль уж борды кутскон сярысь малпанэн улӥмы».
Та нуналъёсы Каймашабашысь пиналъёс Буре ваён но данъян арлы, Улон-вылон интыослэн чеберлыксылы сӥзем арлы проектъёссэс утизы. Соослэсь ужъёссэс школазылэн директорез Р. В. Кочурбаева но Янаул ёрос администрациен кивалтӥсьлэн воштӥсез Г. Я. Миндиярова дунъязы. Куатетӥ но укмысэтӥ классъёсын дышетскисьёс проектсэс Быдӟым Вормонлы 75 ар тырмонлы сӥзизы. Проектъёсссы «Альманах «Дети войны» но «Электронный обелиск с. Каймашабаш» нимаськиз. Нош сизьыметӥ классын дышетскисьёс гуртсэс чебергес карон сярысь сюлмаськизы – нылпиослы шудон площадка тупатыны проект дасязы. Нылпиос Быдӟым Вормонлы сӥзем малпанъёссэс улонэ пыӵатон борды тулыспал толэзьысен кутскозы, куартолэзе быдэстэм ужзэс калыклы возьматыны быгатозы ни. Нош сизьыметӥ классын дышетскисьёс проектсэс нырысь гурт поселенилэн администрациезлы, гурт калыксылы возьматозы на. Соос пиналъёслэн ужъёссылы ӟеч дунъет сётӥзы ке, Каймашабаше нылпиослы шутэтскыны площадка кылдоз. Со пичиосты тазалыко улонэн, ог-огенызы эшъяськыны дышетоз.
Каймашабашысь «Проектъёсъя мастерской» Янаул ёрос администрациен кивалтӥсьлэн воштӥсезлы но ӟеч мылкыд кельтӥз. Гаухар Ясавиевна вотэс бамаз берло гожтӥз: «Монэ Каймашабаш школае классной часэ вазизы, со «Местное самоуправление» нимаськиз. Нылпиос проектъёс дасян бордын тыршизы. Соослэн та нуналэ сюлмаськемзылэн ӟечез азьланяз гуртсылэн улоназ шӧдӥськыны кулэ. Монэ паймытӥз дышетскисьёслэн проектъёс дасян бордын ужаны быгатэмзы. Соос азязы ужпумъёс пуктоно, ужзэс быдэстыны юрттӥсьёс, коньдон утчан ласянь малпаськыны быгато. Мон малпасько, пиналъёслэн котькудӥз проектсы азьланяз быдэсмоз шуыса».
Читайте нас: