Удмурт школаосын дышетскись нылпиос понна вожвылъяськон радъяське

Нылпи ӟуч литератураез удмурт кылэ берыктонъя вожвылъяськонэ удмурт кылэз тодӥсь 9-11 классъёсын дышетскисьёсты, колледжъёсысь, университетъёсысь студентъёсты пыриськыны ӧтё. Солэн нимыз но туж чебер: "Лулчеберет выж: ӟуч - удмурт". Со сярысь ивор сётэмын вожвылъяськонлэн сайтаз.

Вожвылъяськонэ пыриськись одӥг, мылкыд каремезъя тросгес но ке берыктон лэсьтыны быгатэ. Текстъёс, секытлыксэс учкыса, ньыль уровеньлы люкемын. Ваньмаз но куинь вормись чакламын.

Берыктоно текстъёсты басьтоно вожвылъяськонлэн вотэсбамысьтыз. Текстлэн быдӟалаез 1 сюрс печатлан пуслэсь ӧжыт луыны кулэ ӧвӧл.

"Ужъёсты Удмуртиысь Дышетонэз азинтонъя институтысь Тьютор практикаосты азинтонъя центрлэн кивалтӥсез Андрей Клементьев, Москваысь Горький нимо литературая институтысь кылысь кылэ чеберлыко берыктонъя кафедралэн доцентэз, чеберлыко литератураез кылысь кылэ берыктӥсь, критик, литературовед, кылосбур тодосъя кандидат Вера Пантелеева, филолог, кылысь кылэ берыктӥсь, блогер, журналист, фин кыллы дышетӥсь Лукерья Шихова но гожъяськись, журналист, «Удмурт дунне» газетлэн валтӥсь редакторезлэн воштӥсез Елена Миннигараева дунъялозы. Удмуртиын вожвылъяськонэз огез радъясь философияя доктор, кыккылолыкъя ӧнерчи Лариса Широбокова луэ. Ужрадлы Удмуртиысь йӧскалык политикая министерство, «Удмурт Кенеш» огазеяськон но Калыкъёслэн эшъяськон юртсы дурбасьто", - ивортэ "Удмуртия" ивортодэтъя агентство.

Вожвылъяськонэ пыриськисьёс 31-тӥ южтолэзёзь куриськон келяны кулэ, 1-2 оштолэзе дась ужъёсты ужрадлэн вотэсбамаз пуктоно.

Вормисьёс туэ 26-тӥ куартолэзе тодмо луозы. Котькуд пыриськисьлы сертификат, вормисьёслы дипломъёс но кузьымъёс сётозы.

Читайте нас:

Учредитель: Агентство по печати и средствам массовой информации Республики Башкортостан

Регистрационный номер: Свидетельство ПИ № ТУ02-01536 от 6 июня 2016г. Главный редактор: Нигаматуллина Оля Борисовна

Газета "Ошмес" - общественно-политическая, социальная, культурно-просветительская газета удмуртов Республики Башкортостан.

Телефон

Телефон+7 (34778) 2-11-89, 2-18-71

Электронная почта

[email protected]

Адрес

452830, Республика Башкортостан, Татышлинский район, с. Верхние Татышлы, ул. Ленина, д. 91