Уфаын анай кылъя но литературая олимпиадаос ортчизы

Удмурт кылъя но литературая олимпиадае пыриськыны муниципальной этапын умой лыдпусъёс возьматэм 22 нылпи луонлык басьтӥз. Жаляса верано, Ермекей но Татышлы ёросъёсысь быдэн кык пинал Уфае лыктыны ӧз быгатэ. Озьыен, анай удмурт кылъя тодон-валанзэс возьматыны вуизы Татышлы, Янаул, Калтасы, Бурай ёросъёсысь 18 удмурт кылэз анай кыл чотын дышетскисьёс. Соосты эскеризы Янаул но Татышлы ёросъёсысь Каймашабаш но Кальтяево школаосысь удмурт кылъя дышетӥсьёс, та ёросъёсысь удмурт кылъя дышетӥсьёслэн ёрос методической огазеяськонъёслэн кивалтӥсьёссы Ольга Рахимзяновна Давлетова но Люция Ахузяновна Хазипова.

Олимпиадалэн кыкетӥ нуналаз, вормисьёсты но призёръёсты данъян церемоние, лыктӥзы анай кылъёсын но культураосын герӟаськем учреждениосысь представительёс но. Удмурт пиналъёсты ӟечкылаз но азьланьын соослы выль вормонъёс сӥзиз Башкортостанысь удмуртъёслэн национально-культурной центрзылэн тӧроез Салим Гарифуллинович Гарифуллин.

Нош кинъёс призёръёс но вормисьёс луизы?

8-тӥ классын дышетскисьёс пӧлын вормисен ялэмын Янаул ёросысь Вуж Вараш школаысь Аделина Гараева, призёръёс – Янаул ёросысь Шудек школаысь Ксения Мухаметзянова но Татышлы ёросысь Кальтяево школаысь Димитрий Кунакбаев.

9-тӥ классъёс: Янаул ёросысь Каймашабаш школаысь Елизавета Давлетова – вормись, Калтасы ёросысь Бадӟым Качак школаысь Дарина Мухаметгалиева но Татышлы ёросысь Кальтяево школаысь Наталия Гарифьянова - призёръёс.

10-тӥ классъёс: Татышлы ёросысь Улысь Балтач школаысь Полина Шакирова – вормись, призёр – Янаул ёросысь Ямады школаысь Альбина Шаманаева.

11-тӥ классъёс: Татышлы ёросысь Улысь Балтач школаысь Вилиана Сергеева – вормись, призёр – Татышлы ёросысь Выль Татышлы школаысь Ольга Ахметзянова.

Удмурт нылъёс, Кальтяево школаын дышетскисьёс Н. Гарифьянова но Р. Нуриахметова учкисьёслы удмурт кырӟан кузьмазы, нош Выль Татышлы школаысь О. Ахметзянова атаезлы сӥзем кылбурзэ лыдӟиз.