1996 арысь 20 июле Башкортостанысь удмуртъёслэн нырысетӥ учредительной съездазы удмуртъёслэн Национально-культурной центрзы кылдӥз. Соку ик Башкортостан Республикаын улӥсь удмуртъёс анай кылынызы потӥсь газет кылдытон сярысь куронэн вазиськизы. Республикамылэн кивалтэтэз соослэн куронзылы дурбасьтӥз. 1998 арын феврале Башкортостанлэн Президентэз М. Г. Рахимов удмурт кылын республика газет кылдытон сярысь Указ улэ гожтӥськиз. Нош 1998 арысь октябре республикаысь Министръёслэн Кабинетсы газетэз поттон сярысь постановление кутӥз. Озьы 1999 арын 1 июне потӥз Башкортостан Республикаысь удмуртъёслэн анай кылынызы газетсылэн нырысетӥ номерез. Солэн учредителез луиз Башкортостан Республикаысь Министръёслэн Кабинетсы, коньдонэн юрттӥз БР-ысь Печатья но иворъёсъя министерство. Июне дуннеез адӟиз «Ошмеслэн» куинь номерез. Нош июль толэзьысен со арнялы быдэ потыны кутскиз. Газетэз кылдытонэ бадӟым люкет пыртӥз солэн нырысетӥез валтӥсь редакторез Андрей Васильевич Гильмаев. Нош туннэ солэсь ужзэ азинтэ Нигаматуллина Оля Борисовна. 

«Ошмес» - республикаысьтымы удмурт калыклэн общественно-политической газетэз. Со Башкортостан Республикалэн экономической, социальной, общественно-политической азинсконъёсыныз, удмурт калыклэн культураеныз, историеныз, сям-йылолъёсыныз, ужъёсыныз тодматэ. Озьы нырысь номеръёсын ик кылдӥзы «Башкортостан: нунал бӧрсьы нунал», «Калыкмылэн данъяськонэз», «Историямы пыремын», «Кинъёс асьмеос? Кӧня асьмеос?», «Оскон» рубрикаос.