Инкуазьлэн котькыӵе дырыз шулдыр

Инкуазь шумпоттэ на: кезьытсз возьматӥз ни ке но, кема ӧз улы со. Бакчаосысь вань бакча сиёнъёсты бичаны дыртӥм. Кубистаез возид ке, номыр кышкытэз ӧй луысал. Зарни сӥзьылэз адӟытэк но кылиськиз, со кема уг кыстӥськы уго. Тросэз писпуос куаръёссэс куштӥллям ни. Тыпыос но кызьпуос гинэ куаръёссылэсь люкиськыны уг дырто. Гуртысь пудо али но кырын кӧтсэ тыре. Доразы вазьгес берто, туж ӝог пеймыта ни. Кин ке нюлэскы губи шедёз шуыса потэ. Али лӥялгубиослэн, гожмогубиослэн (волнушка), вӧёгубиослэн, коньыгубиослэн (рыжик) дырзы. Эмъяськыны турттӥсьёслы куткулонгуби но тырмыт. Тымет дорысен нюлэскысь машинаослэн куаразы кылӥське. Ми палтӥ бадӟым сюрес ортчоз. Сое лэсьтӥсьёс, дыр. Куазь шулдыр: зорылэ но, отчы ик шунды но потэ. Сайкымгес ни. Сӥзьыллы кадь дӥсяськоно. Кынмемдэ шӧдыса ик уд вутты.  

Сӥзьыл мӧзмыт ке но, узыр. Озьы шуэ калык визьбур. Мон сямен, чик но мӧзмыт ӧвӧл. Чеберзэ но шулдырзэ котькуд вакытлэсь шедьтыны луэ.