Эмчиос гурт калыклы эмюрттэт возьматӥзы

Туннэ, 16-тӥ ноябре, Калтасы ёросысь Бадӟым Качак гуртын улӥсьёс доры Калтасы но Краснохолмский больницаосысь акушер У.И. Тимирзянова, терапевт И.И. Гаптракипова, травматолог И.Х. Габдракипов но хирург Р.Р. Гараев лыктӥзы. Гуртысь фельдшерлэн С.А. Паркутдиновалэн верамезъя, эмчиос «Трезвое село-2023» конкурслэн муниципал этапез улсын калыклэсь тазалыксэ эскерыны вуизы. Калык трос люкаськиз. Угось ёрос больницае шедён понна нырысь ик азьпала гожтӥськыны кулэ. Нош гуртэ вуэм эмчиос котькуд лыктэм адямиез пыр-поч эскеризы, кулэ луись эмюрттэт возьматӥзы.

Фельдшерлэн кылъёсызъя, туннэ нуналэ Бадӟым Качакын, нылпиосты лыдъятэк, 298 адями лыдъяське, соос пӧлысь 58-ез бадӟым давлениен курадӟо, 34 адями пӧртэм висёнъёсын учётын сылэ. Нош нылпиосты учкид ке, соослэн  лыдзы 38 адямилы ӵоша. Соос пӧлын 25-ез школаын дышетске,  нылпи садэ ветлӥсьёслэн но студентъёслэн лыдзы 6 адямилы тупа, нош 1 нылпилы арес тырмемын ӧвӧл на.