-2 °С
Лымы
Антитеррор
Вань иворъёс
Тазалык
11 ноябрь 2021, 10:35

Ковидэн висиды-а?

Милям семьяямы коронавирус 2020-тӥ арын куартолэзе «вуиз».

Ковидэн висиды-а?
Ковидэн висиды-а?

Коронавирус, вакцинация, ковид-госпитальёсын ужась эмчиос сярысь туннэ пӧртэм малпанъёсты кылыны луэ. Куд-огъёсыз муртлэсь кылэмзэс но ассэ синмынызы адӟем кадь «быгатыса» верало.

Алигес Вылысь Татышлыысь одӥгаз ательее пырай. Отын кык нылкышноос штора быръё. Огезлэн маскаез ӧвӧл. Ательелэн кузёез маска поныны курыса вазиськиз. Нылкышно масказэ понӥз но…кутскизы-а бадӟым куараен коронавирус сярысь вераськыны. «Та висён калыкез быдтон понна малпамын. Эмчиослы но номыр кулэ, пе, ӧвӧл. Ковид-госпитальёсын ужасьёс черласьёсты уг, пе, учко», - шуэ огез.

- Соослэн висисьёс доры пыремзы но, пе, уг поты, - вера кыкетӥез.

Нылкышноослэсь юано кариськи, ковид-госпитальын кыллиды-а, эмчиос сярысь сыӵе малпанъёсты кылдэмын шуыса. «Тон кыллид-а? Милям вераськонамы пыриськиськод», - вазиз огез.

- Кылли, - шуисько. – Ковид-госпитальын ужасьёслы но, асьме ёросысь эмчиослы но тау кылъёсме верасько.

- Висемъёс вакцинация уг лэсьтыто кадь, - вазиз кыкетӥез.

- Вакцинация куартолэзьын басьтӥ. Толсур толэзе ревакцинация басьтон дыр вуэ ини.

Нылкышноос шып кариськизы.

Милям семьяямы коронавирус 2020-тӥ арын куартолэзе «вуиз». Нырысь кузпалы висьыны кутскиз, собере -  нылмы, пимы но мон. Арнялы матэ ваньмы но зынэз ӧм шӧдэ, сиёнлэн но шӧмыз ӧй вал.

Мыным висён секыт сётӥськиз шуыны уг луы. Кык нунал температура 37-лэсь вылӥын вал. Бӧрысь нуналъёсы ӧз ни ӝутскы, нош мугорлэсь, ёзвиослэсь висемзэс ноку уг вунэты. Йыр чидантэм висиз. Кузпалылы висён секытгес сётӥськиз. Дас нунал ӵоже температураез 37-лэсь вылӥын возиськиз. Нылмы «ковидэз» кык нуналскын вормиз. Нош пимылэн температураез вить нунал ӵоже 40 пала возиськиз. Туж кышкамы солэн тазалыкез понна. Ёрос эмъюртысь врачъёс но тазалыкмы сярысь котьку юалляськыса улӥзы: пимылэн температураез усьымтэысь, ковид-госпитале мыныны ӵектӥзы.

Республиканской инфекционной эмъюртлэн куатетӥ ёзэтаз шедим. Сое ковидэн висисьёслы тупатӥллям вал. Эмъюртэ уйин одӥг час бере вуим. Милемыз эмчи-инфекционист, ёзэтэн кивалтӥсь Нажеда Колесникова пумитаз. Кагазъёс гожъяса, палатае интыязы.

Ковид-госпитальын ужасьёс ваньзы туж лякытэсь вал. Ноку, нокин урод кыл ӧз вера. Эмчиос нуналаз кык-куинь пол пыро вал висъетамы. Соосты куараоссыя, синъёссыя тодмаськом вал. Медсестраос «горд зонаын» куать часлы быдэ вошъяськыса ужазы. Соослы котьку, котькыӵе юанэн вазиськы, ноку валэктон сётытэк ӧз кельтэ. Доре бертыку но витаминъёс, эмъюмъёс сьӧрамы сётыса лэзизы.

Ньыль борддоръёс куспын улонэз секыт вал. Мылкыд эрике куриське. Но тазалык котьмалэсь дуногес. Висён куд-ог адямиослэсь зэмос ымнырзэс но возьматӥз. Юрттэт киоссэс сётӥзы сыӵе адямиос, кинъёслэсь тон сое чик уд возьмаськы вал.

 

Автор:Миляуша Булатова
Читайте нас: