Бадӟым Качакын арлыдоос пӧлын ӵошатскон ортчиз

Кылем арын сямен ик туэ но ӵошатсконэ ньыль командаос пыриськизы. Ньыль пӧртэм урамъёсын улӥсьёс, ӵошен кариськыса, бызьылыны, тэтчаны, тупен усто вырыны, шашкиен шудыны быгатэмъёссэс возьматӥзы. Шумпотымон, туэ спортзалэ командаос понна «висисьёс» но трос лыктӥзы. Котькуд вожвылъяськон юрттэт карись юн кичабонъёсын кутскылӥз. Командаос асьсэлэсь кужымзэс но сэзьлыксэс паймымон усто возьматӥзы. Ӵошатсконын эшъяськон вормиз.

Та нуналэ трос аръёс ӵоже Бадӟым Качакын старосталэсь ужзэ быдэсъясь Анатолий Апкаримов вордскем нуналзэ пусъе вылэм. Гуртазы со сярысь вань калык ӟеч кылын гинэ вазиське. Угось Анатолий Галямович гурт понна сюлмыныз «висе», аслэсьтыз вакытсэ жалятэк калык понна тырше. Солэсь ужъёссэ Бадӟым Качак гурт поселенилэн кивалтэтэз тодытэк уг улы. Соин вордскем нуналаз Анатолий Апкаримовез гурт поселенилэн администрациезлэн тау карон гожтэтэныз пусйизы.