Чиндэрысь семья вормисьёс пӧлын

Калтасы ёрос администрациялэн дышетонъя ёзэтэзлэн кичӧлтэмезъя, Калтасыысь нырысетӥ номеро, Краснохолмскийысь куинетӥ номеро но Бадӟым Качак школаосысь куать семьяос спорт ӵошатсконын кужымзэс мертазы. Ужрадэ ёросысь «Боевое братство» огазеяськонлэн ёзчиосыз но пыриськизы.

Вожвылъяськон кырын ортчиз. Семьяос бызьылыны, тэтчаны, малпаськыны но пӧртэм ужпумъёсты сэрттыны-пертчыны быгатэмзэс возьматӥзы. Ужрадлэн йылпумъянъёсызъя, Чиндэрысь Анна но Альберт Минликаевъёслэн семьязы куинетӥ интые потӥз. Вераны кулэ, Минликаевъёс котькуд ар та выллем ӵошатсконъёсы  пырисько, котьку ик вормисьёс пӧлын луо.

Фото: Калтасинский район Республики Башкортостан