Калтасы ёросын бызьылонъя йылоллы пӧрмем полумарафон ортчиз

Спортсменъёсты пумитаса но соослы вормон сӥзьыса Калтасы ёрос администрацилэн тӧроез Забир Габдуллин но Россиысь МВД-лэн Калтасы ёросъя ёзэтэныз кивалтӥсь Эрнест Ляпустин вераськизы.

Бызьылӥсьёс пӧртэм кузьдалаез ортчизы: Краснохолмскийысен Ваныш, Калмаш но Калтасы дорозь. Бадӟым Качакысь  Борис Насипуллин полумарафонэ ноку но пыриськытэк уг кыльы. Берло кык ар ӵоже  пиосмурт бызьылон сюрес вылэ нылыныз ӵош потэ. Туэ но Ксения Насипуллина Ванышозь бызиз, нош атаез Калмашозь вуиз. Спорт ужрадлэн йылпумъянъёсызъя, Борис Насипуллин аслаз кузьдалаяз кыкетӥ интые потӥз. Ксения вормисьёс пӧлы ӧз пыры ке но, мылкыдыз чик ӧз быры, угось азьпалан сое одно ик вормонъёс возьмалозы.