Тренерез таукаронэн пусйизы

Пиналъёслэн, егитъёслэн командаоссы ёросын, зонаын но республикаын ортчись ӵошатсконъёсын зол кужымзэс возьмато. Соослэн вормонъёссы но ӧжыт ӧвӧл. Котькуд вормон бордын тренерлэн но люкетэз бадӟым луэ. Командаосын ужа тренерзы Ильгиз Шакиров. Та нуналъёсы Ильгиз Миннихановичез Башкортостанысь правительстволэн таукаронэныз пусйизы. Сое Физкультурниклэн нуналэзлы сӥзем ужрад улсын Уфаын ӟечкылаз республикаысь премьер-министр Андрей Назаров.  

- Асьмелэн валтӥсь ужпуммы – спортэ но физкультурае тросгес адямиосты ваён, – вера Радий Хабиров. – Соин спорт ӵошатсконъёслы сяна, мукет спорт ужрадъёсты дасяны, радъяы но юрттэт возьматӥськом. Арлы быдэ республикаын 15 сюрслэсь ятыр физкультурно-спортивной ужрадъёс ортчо: спартакиадаос, фестивальёс, универсиадаос, знаменательной нуналъёслы сӥзем праздникъёс – «Декада спорта», «День зимних видов спорта», «Лыжня Росси», «День физкультурника», «Олимпийский день», «Кросс нации». Отчы 800 сюрслэсь трос адями пыриське.

Ильгиз Миннихановичлэн вань улонэз спортэн герӟаськемын, шуыны луоз. Со кема аръёс Вылысь Татышлыысь 2-тӥ номеро школаын физкультурая урокъёсты нуиз. Та дыре ёросысь баскетболъя  одӥгез кужмо тренерен луэ.