Выль Татышлыын ӝӧквыл теннисъя ӵошатскон ортчиз

Татын БР-ысь удмуртъёслэн НКЦ-зылэн ёзчиезлэн Радик Рахимовлэн кубокез понна ӝӧквыл теннисъя регионъёс куспысь ӵошатскон ортчиз. Вераны кулэ, Радик Галимзянович та ӵошатсконэз арлы быдэ радъя. Туэ со 12-тӥ ползэ ортчиз. Ӵошатсконэ Аскино, Бурай, Калтасы, Татышлы ёросъёсысь, Бирскысь, Янаулысь, Пермь шаерысь Куедаысь 36 пиосмуртъёс но 12 нылкышноос пыриськизы.

Пиосмуртъёслэн ӵошатсконзы куинь этапен луиз: предварительной, полуфинальной но финальной. Вормисе потӥз Куедаысь Виктор Кашин, кыкетӥ интыын – Бирскысь Юрий Брюхов, куинетӥын – Куедаысь Дмитрий Шарафутдинов.

Нылкышноос пӧлын Янаулысь Эльвира Фархутдинова нырысетӥ луиз, кыкетӥ - Бурайысь Расима Тагирова, куинетӥ – Янаулысь Карина Киселева.

Фото: Администрация Татышлинского района