Спортфестиваль Шудекын. Волейбол

Волейбол вить часлы матэ кыстӥськиз. Нырысетӥ подгруппаын ваче син пумиськизы Бадӟым Качакысь, Каймашабашысь но Максимысь командаос. Татын кужмо луиз Бадӟым Качакысь команда. Кыкетӥ интыын луизы максимъёс, куинетӥ – каймашабашъёс.

Кыкетӥ подгруппаын шудӥзы Вуж Варашысь, Выль Татышлыысь, Сандугачысь но Шудекысь командаос. Котькуд подгруппаын нырысетӥ но кыкетӥ инты басьтэм командаос куспазы шудӥзы на.

Куинетӥ инты понна нюръяськизы Максимысь но Шудекысь командаос. Кузёос кужмогес луизы. Финалын шудӥзы бадӟым качакъёс но выль татышлыос. Шӧдӥське, командаослэн кужымъёссы огвыллемгес. Лыдпусъёс огзы сьӧры огзы уиськыса кадь мыно. Нырысетӥ партиын вормизы ВыльТатышлыысь пиналъёс. Кыкетӥез партия но ӟырдыт луиз. Качакъёс кужымзылы осконзэс уг ышто. Судья ивортэ: «Счёт 21:21». Командаос золгес шудыны кутскизы. Кык очколы гинэ качакъёсты азьпалтыса, вормисе потӥзы выль татышлыос.

Озьыен, волейболын нырысетӥ интые потӥз Выль Татышлыысь команда, кыкетӥ – Бадӟым Качакысь команда, куинетӥ – Шудекысь.