Спорт тазалыкез кыдатэ, капчи мылкыд кузьма

Башкортостанысь удмуртъёслэн национально-культурной центрзылэн уж планэзъя арлы быдэ радъяськись спорт ӵошатскон, пандемиен сэрен, берлось кык арзэ ӧз ортчы ни вал. Туэ Калтасы ёросысь Бадӟым Качакысь, Татышлы ёросысь Выль Татышлыысь, Янаул ёросысь Вуж Варашысь, Каймашабашысь, Максимысь, Сандугачысь но Шудекысь школаосысь нылъёс но пиос ӵошатсконэ шумпотыса пыриськизы. Соослэн мылкыдзы капчи. Спортлэн пӧртэм видъёсаз кужымзэс мертан сяна, татын пиналъёс тодматско, эшъясько угось. Спорт ӵошатскон соос понна зэмос праздниклы пӧрме.

Олимпи шудонъёсты усьтыса вераськизы Шудек школалэн директорез владислав Мухаметшин, Шудек гуртпоселенилэн администрациеныз кивалтӥсь Сергей Байдуллин, Янаул ёросысь егитъёслэн политиказыя но спортъя ёзэтэн кивалтӥсь Альбина Саляхова но БР-ысь удмуртъёслэн НКЦ-зылэн Янаул ёросысь филиалэныз кивалтӥсь Юрис Саитов. Соос спортсменъёслы удалтонлык но вормонъёс сӥзизы.

Котьку сямен ик, туэ но олимпи шудонъёслэн нырысетӥ люкетаз нылъёс но пиос 60, 500 но 1000 метре бызьылонын, эстафетаын, кузьдалае тэтчанын но кузьдалае туп лэзянын кужымзэс мертазы.Нош лымшор бере волейбол кутскиз.