Геройёс пӧламы мед улозы

Быдӟым Атыкай ожысь ветеранъёс чиньыен лыдъямон гинэ кылемын ке но, калык со секыт но кышкыт аръёсты сюлэмаз возе. Нылпиос пӧлын но нуналысь нуналэ та ласянь валэктон ужъёс нуисько. Пиналъёс медаз вунэтэ историез, туннэ шудмы понна бырыны шедем ожгарчиос котьку мед улозы пӧламы.

Бурай ёросысь Алтау гуртын нылпиос трос ӧвӧл ни. Арысь аре удмурт гурт пересьмыса мынэ. Озьы ке но, гужем вуэмен, Алтауысь урамъёс нылпи куараен тырмо. Песяй-песятайёссы доры каникулъёсы вуэм нылпиос шутэтскон вакытсэс гуртысь клубын но библиотекаын ортчыто. Кылсярысь, та нуналъёсы библиотекарь М.Г. Гафутдинова «Под салютом Великой Победы» книгаослэсь возьматон радъяз. Со сяна, пиналъёсын «Память хранят живые» шаерез тодонъя урок ортчытӥз. Ужрадэ люкаськем нылпиос ожъёслы сӥзем книгаосын тодматскизы. Нош нимысьтыз лэсьтэм «Книга Памяти»-лэн бамъёсысьтыз Алтауысь геройёсты утчазы.

Фото: Алтаевская библиотека Бураевского района