"Салют Победы" фестиваль-конкурс Калмияр гурт поселение вуиз

Фестиваль вакчи дыр куспын вань гурт поселениосы вуылоз. Выль ар азьын, кылсярысь, сое Улысь Балтачын пумитазы. Нош 14-тӥ тулыспалэ фестиваль Калмияр гурт поселение вуиз. Со бигер но удмурт гуртъёсты огазея. Соин сцена вылын кык пӧртэм калыкъёслэн аръёс ӵоже ог-огенызы эшъяськыса улэмзы шӧдӥськиз. Ужрадын Савкиязысь куноос учкисьёсты сюлмысь потэм кылбурен но чебер кырӟанэн шумпоттӥзы.

Концертлэсь нырысетӥ люкетсэ Татышлы ёрослэн котырес лыдпусэзлы сӥзизы. Сцена вылысен вордӥськем шаерлы, отын улӥсь калыклы сӥзем кырӟанъёс чузъяськизы. Собере Быдӟым Вормонлы, шаермес утисьёслы сӥзем кырӟанъёс сюлэмез бугыртӥзы. Нош нимысьтыз военной операциын бырем ожгарчиослэсь тусбуйёссэс адӟыса учкисьёслэн синъёссы синкылиен тырмизы. Нимысьтыз военной операциысь ветеран Роман Гильманшин кырӟам бере быдэс зал тыр зол кичабем куараос шукииськизы.

Шумпотоно, та нуналэ культура юртын ужасьёс трос выль нимъёсты усьтыны быгатӥзы шуыса. Татысь «Инвожо», «Инву», «Италмас», «Соловушки» ансамбльёсын ӵош мукет коллективъёс но синмаськымон адӟиськизы. Светлана но Денис Мардамшинъёс, кылсярысь, быдэс семьяенызы «Катюша» кырӟанэз быдэстӥзы. Фестиваль-конкурс «Агро-Танып» СПК-ын тыршисьёсты но сцена вылэ поттӥз. Соослэн чебер кырӟанзы хозяйстволэсь кивалтэтсэ но, пудо утисьёсты но, руль сьӧрын пукисьёсты но огазеяны быгатӥз. Нош макем узыр адӟиськиз школалэн коллективеныз дасям композиция! Сцена вылэ пӧртэм аръёсы нылпиослы тодон-валан сётэм дышетӥсьёс туала кивоштӥсьёсынызы, пӧртэм ужъёсты быдэстӥсь эшъёсынызы ӵош потӥзы. Концертлэсь палэнэ ӧз кыльы гурт поселенилэн администрациез но: учкисьёсты шулдыртӥзы соин кивалтӥсь Павел Мардамшин но татысь водитель Зарифьян Ахметзянов. Та нуналэ учкисьёс кужмо кичабонъёсынызы шумпоттӥзы нылпи садэ ветлӥсь пиналъёсты, школаын дышетскисьёсты.

Фестиваль-конкурс сюрессэ азинтэ. Табере сое ёросысь мукет гурт поселениын пумиталозы. Нош Калмиярын ортчем концерт солэн историяз чебер но яркыт пытьызэ кельтӥз.