Ческыт мед кошкоз!

Инвожо толэзьлэн нырысетӥ нуналъёсаз шумпотыса бичамы бакчаысь нырысетӥ емышез – жимолостез. Собере инкуазь асьмемыз ческыт узыеныз, борыеныз шумпоттӥз. Али ини горд сутэр, эмезь, сьӧр сутэр, чия  кисьмало. Та емышъёслэсь сыӵе ческыт варенняос, компотъёс пӧрмо! Нош горд сутэрлэсь конфитюр лэсьтыса оскалтэмды вань-а? Джемен ӵошатоно ке, конфитюр напгес луэ. Малы ке шуоно сое пӧзьтыку, желатин ватсано.

Конфитюр лэсьтон понна кулэ луоз: 1 килограмм емыш, 500 грамм сакыр, 70 мл ву, 20 грамм желатин.

Миськыса куасьтэм емышъёсты нельконо, сӥс пыр поттоно, вуын тордытэм желатинэз ватсаса, быректытоно. Собере сакыр пононо, тыл вылэ пуктоно. Быректэм бераз, пичи тыл вылын 5-10 минут пӧзьтоно но пар вылын пӧсятэм банкаосы тыроно. Конфитюр дась. Ческыт мед кошкоз. Банкаосты салкым интые – холодильнике, гуэ – пуктоно.