Губи бичан дыр вуиз

Нюлэскы мыныны дасяськиськом

Нюлэскы мыныку сьӧре басьтоно: пурт, пичияк сиён, шырпу, шулан, телефон (вань ке, портативной зарядник), висисьёслы – эмъюмъёссэс. Дорысьёслы одно ик верано, кыӵе нюлэскы мынэмез но ку бертэмез.

Туала мобильной телефонъёсын gps-навигатор вань. Со адямилэсь кытын луэмзэ возьматэ. Йыромыны шедьыку ориентированиея программаос – «Гугл.Карты» но «Яндекс.Навигатор» - юртто. Нюлэскы яркыт - ӵуж, горд, тӧдьы, нап-ӵуж - дӥськутэн мыныса умой луоз.

Губи бырйиськом

- Тодмотэм губиосты бичано ӧвӧл.

- Сьӧре губиосъя атлас басьтыны луэ.

- Губиосты кудые бичаса умой луоз: уз пырдэ, уз ӝокалэ.

- Губиос секыт металлъёсты, ядъёсты губка кадь бордазы кыско. Соин соосты сюрес кузяысь, заводъёс вӧзысь бичано ӧвӧл.

- Вужмем губиосты бичаны уг яра.

- Губиосты доре бертэм бере ик сузяно.

- Тодмотэм адямиослэсь губизэс эн басьтэ. Соос оло чылкыт омыро нюлэскысь бичамын, оло завод вӧзы интыяськем шай вылысь.

Нюлэскысь кызьы потоно?

- Сюресэз ӧз ке но возьматы,GPS-навигатор кытын луэмез тодыны юрттоз,

- Юрттэт возьматонъя службае 112 номеро телефонъя жингыртоно. Со понна коньдон уз басьтэ. Таӵе дыръя шулан но юрттоз. Со пӧйшуръёсты но кышкатоз.

- Нюлэскы пырыку шундылэсь кудпалась пиштэмзэ учконо. Кылсярысь, пырыку со баме пиштэ ке, потыку тыбыре пиштоз. Но вужер шонерак азе уз усьы, со сюреслэсь ӧжытак бур палан луоз.

Тазалык нырысетӥ интыын

Сиёнтэм губи сиыса, адями кулыны быгатэ. Соин губи сием бере кӧня ке дыр ортчыса, кӧт висемдэс шӧдӥды ке, йырды ке берга, эмъюртэ вазиськыны дыртэ. Ӝог эмъюрттэт возьматӥсьёс лыктытозь, сылало ву юоно, ӧскыны тыршоно. Вунэтоно ӧвӧл, тазалыкмы асьме киын.

Ботулизм

Губи сиыса, кышкыт висьыны кутскисьёс но вань. Ботулизм висёнэз спора выллем палочкаос кылдыто. Соос сюйын луо. Ботулизм палочкаос пӧзьыса гинэ уг быро. Соос консервировать карем банкаын эшшо но йыло. Соин ик бичам губиез умой сузяно, миськоно.

Ботулизм ас сярысьтыз шӧдытэ губи сием бере 12-72 часскын. Синъёс ляб адӟыны кутско, син азьысь суредъёс кык луыса адско, йыр берга, ӧскем потыны кутске, шокан пытсаське, кӧт висе.

Консервировать карем губи сиемды бере умойтэмзэ ке шӧдӥды, ӝегатскытэк эмчилы вазиськоно.