Куартолэзь

Куартолэзь - арлэн сяськаез. Инкуазь улӟе, ваньмыз вожектэ, сяськаяське, жингыртэ. Бусыос нош ик шулдырмизы кизисьёслэн, машинаослэн куараосынызы. 

Куартолэзь туж сюлмо ужа, уно ваньбур поттэ, соин ӵош ик праздникъёсын но узыр. Нырысетӥ куартолэзь - шумпотонэз но шудбурез, азьланьын ӟеч улонлы осконэз возьматон праздник. Укмысэтӥ куартолэзе асьмеос арлы быдэ пусйиськом Быдӟым Вормон Нуналмес.

Возь вылэ чебер ковёр сямен вӧлдӥськизы пӧртэм сяськаос. Куаръясько писпуос. Юг-юг пурӟо льӧмпуос. Жуэто ужез яратӥсь мушъёс, сумбресэсь, пуштресэсь майсыос. Няськыт омыре ческыт зын лӧсъяськемын - нырез ик бичатэ.

Небытэсь пучыоссэ ошылыса сылэ кызьпу. Нош беризь  зэмос шунытэз вите. Со угось тодэ куартолэзьлэсь пӧечи сямзэ. Юнме шорысь уг верало ук: «Май пӧялоз, нюлэскы пегӟоз». Тулыслы быдэ ик озьы луэ уга: льӧмпу сяськаян вакытэ куазь кезьыт кариськылэ.

Льӧмпу сяська тӧлӟыса уг вуы на, югектэ ни улмопу, сяськаяло сирень, акация. Учкиськод но, тӧдьы кызьпумы но чебер дыды кадь дӥсяськем ни, йырзэ бабыльтэм, пель угыоссэ ошылэм, пыдъёссэ лысвуэн миськем.

Ӵукна но, ӝыт но котькытысь кылод тылобурдоослэсь крезьгуръёссэс. Инмын тюрагай кырӟа, арамаосын уӵы чирдэ. Нюлэскын кыдёке чузъяське «ку-ку! ку-ку!» Лесникъёслы, тэль будэтӥсьёслы кикы ивортэ: «Тани мон но вуи тӥледлы юрттыны». Лесникъёс зэм но ярато та амало, провор, куӵо бурдоез: со писпуосысь нымы-кибыосты но соослэсь тэчкыоссэс быдтэ.

... Шунды пӧсь тылсиоссэ кисьтэ. Котырак ваньмыз вожектэмын. Уката ик шуныт зор кисьтэ на ке, котьма чаль будэ. Ӝутско юос, турын-куаръёс. Пудоос кырын сисько ни.

Куартолэзь - тужгес шумпотымон дыр. Сое шулдырто тылобурдоослэн кырӟанъёссы, чебер каро яркытэсь сяськаос. 

Василий ШИРОБОКОВ.