Музъем сайкамен отын улӥсьёс но вырӟо

Кызьы сыӵе нуналэз ортчытод на? Ужаса. Кырын ужан ачиз шутэтскон ини со кема ортчись тол бере. Соин бакчаям ужаны потытэк ӧй чида. Борылэсь убозэ гудон сямен сьӧд тусъем шобрет улысь но куасьмем куаръёс пӧлысь кенӟали потӥз. Шорам учке, нокытчы дыртэмез уг поты. "Малы монэ сайкатӥд? Изьысал но изьысал на", - шуэ кадь. Шунды шорын шунскыса гинэ соос шумприч луо вылэм. Интернетысь учкытэк ӧйлась, кызьы соос толзэс пото. Кытысь мон сое сайкатӥ, озьы ик толъё вылэм: кытысь ке шуныт инты шедьтыса яке кӧня ке кузя огазе биниськыса.

Кенӟалиос туж ӝог бызьыло, туж трос нымы-кибыосты сиё. Туж ӵем  ымазы адӟем "сиёнзы" бызьыса кошкыкузы ик сюре. Кезьыт куазь бере соос калленэсь, асьсэлы сиён шедьтыны но уз на быгатэ. Соин, вылды, мынам выль тодмое ассэ кие кутыны но лэзиз. Нош гужем ке луысал, со кема малпаса ӧй улысал, быжзэ чигысал но кошкысал. Мон сое кытысь шедьтӥ, отчы ик понӥ. Пӧсь куазь вуытозь, оло, нош шуныт инты шедьтоз.