-3 °С
Салкым
Антитеррор
Вань иворъёс
Пӧртэм-пӧртэм
18 ноябрь 2021, 13:55

Очкарикъёс

«Ньыль синмоос, тортиллаос, очкарикъёс» нимало милемыз. Милемлы капчи ӧвӧл – синъёсмы ляб адӟо.

Очкарикъёс
Очкарикъёс

Мон дальнезоркостен курадӟисько. Синъёсы ляб адӟо шуыса покчи классъёсын дышетскыкум ик тодӥ, озьы ке но очки нуллыны кутски 7-тӥ классэ пырем бере гинэ. Туннэ кадь тодӥсько на нырысьсэ очки понэм нуналме. Школаысь бертӥ но, очкиме поныса бакчае потӥ. Куарусён толэзь, картофка октон дыр. Котыр утчаськон сямен, пужым нюлэс сьӧрысь гуртэз синйылтӥ. Юасько: «Ма гурт со? Кытысь? Азьло но со отын-а вал?» Ваньзы серектӥзы гинэ. Собере ӵужмуртэ вераз: «Со – Урманкуль (калыкын Кутмастау шуо). Со гурт кемалась ини отын сылэ».Озьы мон аслым «открытие» но лэсьтӥ: Аскын ёросысь гуртэз «усьтӥз».

«Пияла синъёсме» шумпотыса уг нуллӥськы вал. Малы ке но кепырес вал очкиен ветлон. Зэмзэ верано ке, али но уг яратӥськы очки нуллыны. Укта ик толалэ. Кезьытысь шуныт интые пыриськод но, аквариуме шеди кожалод – номыр уг адӟиськы, «синъёс» нюламын. Нош мар карод, синъёс уг адӟо бере, очкитэк ветлыны уг луы? Ярано,  контактной линзаос вань. Но соосты ӵем вошъяно.

Ляб адӟисьёс инмысь кизилиосты но, музъемысь котькуд нымы-кибыосты но пыр-поч адӟыны, эскерыны уг быгато…

Секыт, куке ортчись-мынӥсьёслэсь ымныр тусбуйёссэс тодманы уд вуиськы. Очкитэк вамышъякум котьку малпасько: «Нош ик кинэ ке тодматэк, ӟечбуръяськытэк ортчо но, соос вералозы, тодмоослы вазиськытэк, пе, ортчисько шуыса». Синмо синтэмез ноку уз вала.

Автор:Миляуша Булатова
Читайте нас: