Бурай ёросысь мамадыос вӧсьсэс ортчытӥзы

Мамадыослэн вӧсьсы инвожо толэзьлэн куинетӥ арнянуналаз ортче. Котькытын сямен, соос но гуртысь кеньыр бичало. Нош вӧсяло така. Такаез черодэн котькуд семья сётыны тырше. Туэ мамадыос сизьым така вандӥзы. Така кузёос асьсэос ик така сӥлен ӝук пӧзьтонэ пырисько. Кышномуртъёс чебер удмурт дӥськутэнызы лыкто. Лымшор вакытын калык вӧсь кыре лыктыны кутске. Нырысь лыктэмъёс лым сиё, собере куриськон кутске. Инмарлы вазиське Виталий Шамшияров. Солы юрттӥсько Гафурьян Минниахметов, Назиф Сайранов, рафит Фархутдинов, Максим Камаев. Ваньзы Инмарлэсь ӟечлык, капчи зоръёс, умой ю-нянь куро. Собере вӧсе пыриськисьёс кызьпулэн гырказ вуын гылтэм азвесь уксё тыро, шуд, тазалык курыса. Семьяын кӧня кузя адями, сомында ик азвесь коньы поно. Со коньдонэз отысь нокин басьтыны уг дӥсьты. Пересьёслэн верамзыя, висись, пе, кылёд, басьтӥд ке. Нылпиос вӧсе уг ветло.  Лыктэмъёслы ӝук сётыса лэзё. Доразы сое Инмарлы куриськыса вань семьяенызы сиё.