Андреевкаос «Зор курон» радъязы

Гырон-кизён, бакча мерттон ужъёс йылпумъямын. Табере калык шуныт зоръёсты вите. Туэ куазь куартолэзе ик  гужем кадь пӧсь кариськиз. Инмын одӥг пилем но уг адӟиськы. Будосъёс, кизем юос, музъеме пыртэм кидысъёс зор курыса «бӧрдо». Адямиос но сюлмасько куазь зорымтэысь.

Янаул ёросысь Андреевкаын улӥсьёс, вашкала йылолзэс улӟытыса, «Зор курон - пылатъяськон» ужрадэ люкаськизы. Арлыдоос но нылкышноос, киосазы вуэн ведраос кутыса, урамъёстӥзы ортчизы, пумитазы шедисьёсты вуэн пылатъязы. Нош пиосмуртъёс со дыре шур дурын ӝук пӧзьтӥзы. Сое веръяны котькуд мылкыд карись адями вуиз. «Кызьы ми вуэн шудӥськом, озьы куазь мед зороз», - Инмарлы вазиськиз вӧсясь.

Фото: Андреевский СК