Татышлы ёросысь Выль Татышлы гуртын Тол вӧсь ортчиз

Азьвыл аръёсы та вӧсе кык ыж вӧсяло ке вал, туэ ньыль ыж вандӥзы. Одӥгзэ курбон карыса вӧсьлы сётӥз Выль Татышлыын улӥсь Эрик Марданов. Вӧсьын ужасьёслы юрттӥськизы гуртысь ньыль нылкышноос. Инмарлы вазиськизы Выль Татышлыысь валтӥсь вӧсясь Раис Рафиков но бальзюгаослэн куриськисьсы Фридман Кабипянов. Вӧсез ворсаса, югезьлы куриськыкуз Раис агай Инмарлы ваньмыз понна тау карыса, вань калыкъёслы ӟеч но тупаса улон, нылпиослы шудо-буро улон курыса, ожгарчиослы таза но ӟечкын бертэмзэс сӥзьыса вазиськиз. Нимысьтыз куриськиз ыж сётэм семья понна.