Буш коркаослэн липетъёссы но ӝожмыт тусо

Тодматскон
Тани со, дунне пыдсы интыяськем удмурт гурт. Нокинэн азьпаласен вераськытэк, вуэммес вератэк лыктӥмы бере, милемыз пумитась ӧз луы. Юлтошъёсылэн, Уфаысь но Удмуртиысь учёнойёслэн Ранус Садиковлэн но Николай Анисимовлэн татчы вуэмзылэн валтӥсь мугзы пулэз лусйыса шайвыл гожтос пуктэмзэс шай вылысьтызы адӟон но туспуктэм лэсьтон вал. Машинаын ик йырам ӟалык керттыса, вамыштӥ эшъёсы сьӧры. Шайзы дэулэкэнъёслэн гуртэ пырон вадьсын ик. Сое котыртыса, шедьтӥм на одӥг вуж сямен ватон сямзэс. Туала вакытэ со пул интые памятникъёс пуктыло ни.
Вамыштӥм гуртэ. Пичи гинэ со, одӥг урам. Радэн сылӥсь юртъёсын, шӧдӥське, кудаз ке улон шока на, нош кылемъёсыз пыраклы ворсаськемын ни. «Толалтэ сельсовет сюрес усьтэ» шуыса оскытӥзы ке но, таӵе кыдёкын улонэз секыт, дыр. Сиён-юонлы магазинэ ветлонэз гинэ басьты. Дырын-дырын автолавка вуылэ, пе.
Толалтэ татын куинь коркан гинэ тыл ӝуатске на, сизьым адями улэ. Кылемъёс кезьыт толэзьёсты городъёсын ортчыто, нош вазь тулыс асьсэлэн юртазы ик бертэмзы потэ, вордскем палзы кыске. Маиз туж тунсыко потӥз: татын улӥсьёс ваньзы но удмурт кылын верасько, бигерзэ но анай кылзэс кадь тодо. Нош бадӟым качак палъёсты удмурт палъёс шуо. Асьсэлэн вераськон манерзы Илиш ёросысь ташкичиослы тупа. Гурт вӧзазы утиськемын на вӧсяськон интызы. Со сярысь верало отын будӥсь ӝужытэсь писпуос.
Нырысетӥез ик юрт, кудаз пыримы, милемыз пушкысеныз ӵогам ӧсэн пумитаз. Ӧз удалты. Кызьы берло тодӥм, отын улӥсез тодмотэм адямиослы усьтыны курдам. Кылӥськиз мотоблок куара. Со бускель юртэ пыриз. Отын кык агай-вынъёс но соослэн анайзы уло. Анайзылэн пенсиез сяна, пудо вордыса, уксё потто. Эркын бусыосын ветлэм валъёссэс сӥзьыл шумпотыса басьто. Озьыен, милемын нырысетӥез удмурт сямен вераськись луиз мотоблоклэн кузёез Алик нимо воргорон. Со милемыз лэзиз мӧйыгес адямиос – Галиулла Галлямович но Факия Байрамгуловна Галлямовъёс - доры. Факия апай татчы 1965-тӥ арын кен луыса лыктэм, кузпалыныз гумыр карем. Тазалыксы ляб ини, соин толалтэлы нылпиоссы соосты Нефтекамске нуо. 

(Быдэсак материалэз лыдӟыны быгатоды газетлэн 36-тӥ номерысьтыз). 

Автор: Анна БАЙДУЛЛИНА.