Сюлэмзы огез пумысен висе: бадӟымез пизы ож лудын

Зэм, егит кузпалъёс нырысь Казахстанын улӥллям. «Куинь арскын вордскем палъёсамы берытским», - шуэ Л. Зайнуллина. Алтауэ бертыса, соос гурт хозяйствое ужаны интыяськиллям. Люся апай скал кыскисьын тыршем, Александр Гарифуллович бригадир вылэм. Со сяна, солы сварщиклэн, механизаторлэн ужзы тодмо. «Туала улонын ваньмыз вань. Каньыл улӥськом. Но малы ке но сое дунъяны ум быгатӥське. Азьло ужам аръёсты туннэ нуналэн уд ӵошаты ни. Уж трослы капчиямын. Но гырымтэ, кизьымтэ бусыосты, турнамтэ возьёсты адӟыса, мылкыд секыт луэ, сюлэм пыже», - шуэ А. Зайнуллин. Кузпалъёс котьку гидкуа тыр пудо вордыса улӥллям, муш утиллям. Али соослэн ыжъёссы, курегъёссы вань, гужемлы чипы басьто.

Туннэ Зайнуллинъёс - куинь полэс анай но атай, яратоно песяй-песятай, ӵужай-ӵужатай. Кузпалъёсты пизылэн нылпиоссы но шумпотто ни.

- Нылпиосмы берто ке, быдэс корка тыр луиськом. Яра, соос вань. Юртъер котырысь бадӟымесь ужъёсты ӵош ужало, юрттӥськыны ӵем вуо, - шумпотыса верало кузпалъёс.

Ми вуылон нуналэ но кузпалъёслэн Бурайын улӥсь Владислав пизы, Нефтекамскысь Лилия нылзы семьяосынызы анай-атай юртазы картофка октыны бертӥллям вал. Ӵошен соос бадӟым ужзэс ӝог йылпумъязы. Анай-атай сюлэм соос шоры учкыса шумпотэ, нош огез пумысен висе – бадӟымез пизы ож лудын.

В. Зайнуллин 2023-тӥ арысь 14-тӥ гудырикошконысен нимысьтыз военной операцие пыриське. 

(Быдэсак лыдӟе газетысь).