Гуртысь 16 семьялы – 38 скал

Тыршись калык улэ

- Можгаос туж тыршисесь, - вера Шудек гурт поселениен кивалтӥсь Сергей Байдуллин. – Отын пудо трос вордо, 16 семьялы – 41 йыр сюро пудо. Ужзэс капчиятон понна тросэз самоходной техника тупатъязы. Можгаын кык МТЗ трактор, кык Т-40 трактор, одӥг ЮМЗ-6 трактор, одӥг Т-40 трактор, кык минитрактор, 11 самоходной техника лыдъяське.

Пудо вордӥсьёс йӧл, вӧй, йӧлвыл, кузятэм вузаны Нефтекамске, Янаулэ ветло. Котькудзылэн асьсэлэн вуз басьтӥсьёссы вань. «Гуртын улыса, кызьы пудо уд ворды? – шуэ Владислав Фазлиахметов. – Ноку пудотэк ӧм улэ. Ужаку но вутскиськом вал пудо сиён дасяны. Пенсие потыса, пудоез йылэтӥм. Пудо сиён дасяны табере сюлмаськонэз ӧвӧл, гуртмы вӧзысь ик турын тырмытыны луэ».

Владислав Муллануровичен гуртэ пырыку пумиським, со турын турнанзэ йылпумъяса, лымшор азьын дораз сиськыны бертыны дасяське вал. «Гуртын техникатэк уг луы», - шуиз со самоходной тракторез шоры возьматыса. Улонзэ со корт «эшъёсызтэк» син азяз пуктыны уг быгаты. Угось 42 ар ӵоже гурт хозяйствоын МТЗ тракторен ужам. Кузпалыз Евдокия Сергеевна но гурт хозяйствоын тыршем – фермаын скал кыскем. Кузпалъёс 45 ар ӵоже ни улон сюрестӥ ӵош вамышто. Соос ныл но пи будэтыса, бадӟым улон сюресэ поттӥзы. Нылпиоссы семьяенызы Шудекысь «Италмас» микрорайонын уло. «Нылпиосмы но гуртын, асьсэлэн корказы, улыны мылкыд каризы, городын улэмзы ӧз поты. Соос ми доры ӵем вуыло, турын дасяны юртто, мукет бадӟымесь ужъёсты но ӵошен ужаськом, ӵошен шутэтскиськом», - вера В. Фазлиахметов.

Гуртлэн кылдэмез но азинскемез

Можга гурт 1683-тӥ арын кылдэм. Со Уранской волосте (берло Байгузинской нимаськем) пырем. Вашкалаослэн верамзыя гожъямъёсты эскероно ке, удмуртъёс татчы раскулачивание дыръя Удмурт Элькунысь вуиллям.

(Быдэсак лыдӟе газетлэн 32-тӥ номерысьтыз).