+10 °С
Облачно
Общество
14 Августа , 12:10
Гуртын ожгарчиослы сӥзем мемориал плитаос усьтӥзы
Кылем арын сӥзьыл Татышлы ёросысь Улысь Балтач гуртын Данъян аллея усьтӥзы. Со быдӟым Атыкай оже пыриськемъёслы обелискен артэ интыямын. Данъян аллеяысь 15 мемориал плитаос борды чечен ожын, нимысьтыз военной операциын бырыны шедем пиослэн нимъёссы гожтэмын. Туннэ, отчы нош 9 ним ватсаськиз.
Зэмос геройёслэн нимъёссы: Юрий Баймиевлэн, Насим Галиевлэн, Леонид Гильмияровлэн, Пётр Давлатхановлэн, Финат Давлетбаевлэн, Фирдус Садрихановлэн, Валентин Сюндюковлэн, Любомир Фазлыевлэн, Ильнур Хайдаршинлэн.
Сюлэмез вырӟытӥсь ужрадэ гурт калык, нимысьтыз военной операциын бырем улосчиосмылэн матысьёссы, ӵыжы-выжыоссы, эшъёссы, дышетӥсьёссы но пиналъёс пыриськизы. Митинг минут ӵоже чус сылыса, геройёсмылэсь ӟеч нимзэс данъяса кутскиз.
Ужрадэз усьтыса вераськизы Татышлы ёрос администрациен кивалтӥсь Денис Султанов, Улысь Балтач гурт поселениен кивалтӥсь Эдуард Рахимзянов но мукетъёс. «Та пиос - асьмелэн зэмос геройёсмы. Соос ас улонзэс ӧз жалялэ, Атыкай музъеммес утизы, асьмелы тупаса улон мед луоз шуыса. Табере соослэн нимъёссы та юн пул вылын пыраклы кылёзы», – вераз Денис Айратович.
Бырем ожгарчиослэн нимтулъёссы мемориал плитаос вылэ «азвесь» букваосын гожтэмын. Соос туспуктэмъёссы пыр осконэн «учко». Соосты адӟыса, тросэз синвуоссэс кутыны ӧз быгатэ, Буре ваён ужрад сяська пононэн йылпумъяськиз. Ужралдэ лыктэм котькуд адями малпаз: «Ми ноку ум вунэтэ асьме геройёсмес, соослэн подвигзы сюлэмъёсамы улоз».
