"Усточикар" лагерез шулдырто кырӟасьёс

Кырӟасьёс борды итӥське гитара гур но. Озьы «Эстрада» ӧре ветлӥсь пиналъёс выль кырӟанзы бордын ужало. Сое Вылысь Татышлыысь Аксинья Милиаскарова, пе, кырӟалоз. Солы юрттӥськозы мукетъёс но. «Пиналъёс сюлмысь ужало. Соос бордын ачим но пиналмисько кадь», - вера БР-ысь культура удысысь сӥё-дано ужась И. Шайхлисламова. Та вакытэ соос Татышлы ёросысь одӥгаз гуртэ потыса возьматоно концертэ дасясько ни. Отын А. Милиаскарова сяна, Вязовкаысь Л. Гарифянова, Бальзюгаысь С. Шакиров, пе, огназы кырӟалозы. Нош ваньзы ӵошен учкисьёслы удмуртсэ но, ӟучсэ но кырӟанзэс кузьмалозы. «Эстрада» ӧре шумпотыса ветло на Куеда ёросысь Гожанысь Влас Кусаинов но Вуж Шагиртысь Алёна Сабурова. Соос школаязы анай кылзэс уг дышето ке но, лагерьын шутэтскись пиналъёсын удмурт кылын кусып возё.